“… BULA ARIBA KAI ABOU! …” Mi sa ku na momentu mi a disidí di drenta e arena polítiko, i sigur e desishonnan ku mi a/por bini ta tuma i bosiferá no ta na agrado di tur hende.

April 1, 2017 REDAKSHON

Mi sa, mi ta konsiente paso ma sintié den mi alrededor tambe – hende mi tambe yama, mi ta yu/ ruman/ subrinu/ primu/ amigu/ profeshonal promé ku mi ta polítiko. P’esei mi ta pidibu pa ta skerpi riba mi akshonnan polítiko i no tilda ni blasfemá mi ku akshonnan di otro.

Mi ta konsiente ku rib’é mundu aki mi no por komplasé tur hende, ni por kai na agrado di tur, pero si mi tin un propósito pa sirbishi general di hende kual mi semper di mi bida ma hasi (no den polítika so sino pafó tambe komo suidadano aktivo – plùs risibí rekonosementu internashonal komo embahador hunenil @OneYoungWorld) pa motibu di ehersé ku masha amor, fervor, pashon i dedikashon.

Ami ta bisa semper mil bia mihó bo sa kiko bo tin na ami, ku bo no sa kiko bo tin na ami – ni kiko pensa (yamami algu ku un motibu o argumentu su tras).
Delantá bo sa ku komo hende mi no ta perfekto, pero si mi ta trahá na perfekshon segun e imáhen i semehansa ku nos tur tin den nos i por laga biba den nos.

P’esei ami ta bisabu o pidibu pa keda tenemi skèrpi. Pero skèrpi no ta tolerá komentarionan di insulto ni denigrante pa niun hende, ni ta tolerá menasa.Ken ku konosémi, i ken ku ta dispuesto di konosémi, i ken ku a/ta/i lo depositá nan konfiansa den mi propósito polítiko – ta akseptando tambe pa tenemi skèrpi. P’esei mi ta keda gradesido, pa kada un stap ku nos dal keda dos pia riba tera, e ta eksigí un kurashi i un fortalesa interno ku fe so por duna.

Pues un yamada ta bai pa e numbernan anónimo/ mensahenan destruktivo/ menasanan ku mi a bini ta risibí último dos dianan for di despues di a bosiferá “BULA ARIBA KAI ABOU, DIA 28 DI APREL, ELEKSHON NA KÒRSOU” na e manifestashon síviko i pasífiko pa demokrasia ku henter pueblo a realisá ku esei asta si nan yam’é mañan, otro siman, aki sinku luna o kada aña pa motibu di nos propio desishonnan – e ta keda e hèrmènt mas importante demokrátiko di nos derechi fundamental i nos mester respet’é. proteh’é i kuid’é. E tarea ta na nos komo suidadano pa huntu nos konsientisá, eduká i reflehá den e institutonan demokrátiko es ku nos ke mira ehersé e trabou korekto pa nos tur.

Meskos ku mi ta duna libertat di ekspreshon riba mi páginanan, mi no ta tolerá libertinahe den mi besindario (p’esei hustamente hende mester ‘take a stand’ pa loke nos ke den bida). Nos tur tin e derecho universal pa bosiferá nos opinion ku rèspèt, p’esei mi ta hasi un yamada di pas – sino mi ta duna riba kada unu di e menasanan aki un ‘aangifte’/denunsia pa laga hustisia hasi su trabou.

Ami ta keda kere ku e propósito aki ta unu pa sirbi un i tur. Pues asta pa esun ku no ta kere den mi paso mi ta yòn sin eksperensia, ku no sa ken mi ta, ku ta papia ménos bon di mi, asta pa esnan ku a kometé inhustisia ku mi, pa nan tambe mi awe ta un polítiko – i esei ma bisa for di mi entrada 12 di yüni 2016 – kaminda tur hende ta konta, e vishon ku tin mi aki komo pionero den e mihó di e senario – ku ta sòru di balansa i keda honesto apesar di kualke sirkunstansia.

Laga nos buska e refleho den nos mes i alinea kiko ta loke nos ke mira den nos nashon, i loke nos por reflehá pa mundu.
Laga nos profundisá mas di ta lus den bida di otro, i sostené na lugá di destruí. Laga pa nos palabranan por ta fundamentu di nos akshonnan konstruktivo pa un mihó mañan.
Si bo ta deseá di mira kambio, sòru pe komienso di kambio kuminsá ku bo mes.
Ami ta hasi di mi parti pa un Kòrsou mas mihó ku esun di awe, spera di por konta ku bo tambe p’esei.

#BulaAribaKaiAbou
#TenemiSkèrpi
#SkèrpiRiba2HUSTU
– Gwendell Mercelina Jr.

“So you act, so you feel, so you are!
It ain’t about the size of my car, it is about the size of the faith in my heart.”