Minister Van Heydoorn ta risibí Vanessa Mercera

Minister di Enseñansa, Siensia, Kultura i Deporte, Sithree van Heydoorn, a risibí atleta Vanessa Mercera pa un bishita di kortesia, despues di su prestashon eksitoso na EK Atletismo Birmingham 2026.

Vanessa a forma parti di e team di Hulanda den 4×400 meter, kaminda su kontribushon den e series a yuda e team klasifiká pa final. Finalmente e team a konkistá medaya di oro, hasiendo Vanessa tambe kampeon di Europa 2026.

Durante e enkuentro, Minister a papia ku Vanessa tokante su eksperensia, e kaminda ku a hib’é na e logro aki i, naturalmente, su plan- i ambishonnan pa futuro.

Minister Van Heydoorn a felisitá Vanessa personalmente pa su prestashon i perseveransia, i a ekspresá e orguyo ku nos ta sinti ora un talento di Kòrsou ta sobresalí riba podio internashonal.

Pabien Vanessa! Kòrsou ta orguyoso di bo. Sigui persiguí bo metanan i inspirá nos siguiente generashon di deportistanan.