Parlamentario Humphrey Davelaar kier para e inhustisia ku ta ser hasi kontra trahadónan,

Parlamentario Humphrey Davelaar kier para e inhustisia ku ta ser hasi kontra trahadónan, kaminda un doño di trabou ta retené impuestonan i primanan obligatorio pa lei for di salario di trahadónan i ta violá e lei dor di keda sin hasi e transferenshanan di esakinan na e instansha konserní……….

Ya a bira un kustumber ku tin doñonan di trabou ku pa lei tin di retené impuestonan i primanan for di salario di trahadónan i ta keda sin hasi e transferensha di e plakanan aki pa e instanshanan konserní. Esaki naturalmente ta trese kuné ku Ontvanger di Kòrsou ta manda aanslag pa e trahadónan indikando na nan ku nan debe impuesto i prima na Ontvanger.
Esaki ta pone ku e trahadó ku ta esun final responsabel pa paga e primanan i impuestonan konserní pa lei, ta hañ’é den un situashon kaminda e tin di bai paga dos bes mesun prima i impuesto di e aña korespondiente na instanshanan konserní, pa puru negligensha di su doño di trabou.
Mas tristu aun ta ora un trahadó ku pèrdè su trabou bin komprondé ku su persona debe prima i impuesto, kaminda ya su doño di trabou a retené e impuestonan i primanan for di su salario.
Ta un inhustisia ku den lei tin para ku ta e doño di trabou tin e obligashon di hasi e retenshon di e respektivo primanan i impuestonan for di salario di un trahadó anto na e otro un banda e trahadó ta bira víktima si e doño no transferí e plakanan pa instanshanan konserní.
Mas tristu ta ora un kompania bai bankarota i e trahadó ta keda sin trabou sin sèn anto ku debe di primanan i impuestonan ku ya su doño di trabou a retené kaba for di salario.
Nos leinan no ta tantu skerpi pa obligá i sanshoná un doño di trabou ku faya ku e reglanan aki.
Tampoko nos leinan no ta protehé e trahadó sufisientemente si e echo ku un doño di trabou faya ku su responsabilidat di retené i transferí e plakanan di impuestonan i primanan retené for di salario di su trahadónan.
P’esei Partido Nashonal di Pueblo ta kondena e aktuashon di doñonan di trabou ku ta kometé e aktonan aki i públikamente ta eksigí di Gobièrnu pa den un tèrmino di un siman inisiá e proseso pa adaptá i hasi e leinan di retené impuesto i prima dor di doño di trabou di tal forma ku na final di kuenta e trahadó no ta bini hañ’é den un situashon kaminda e tin di paga dos bes pe mesun impuesto òf prima na e instanshanan konserní.
Si den e tempu indiká Gobièrnu ku tin tur rekurso pa kambia un lei asina aki fásilmente no inisiá e proseso ariba menshoná, no ta keda e Frakshon di Partido Nashonal di Pueblo den Parlamento nada otro di riba propio inisiativa traha un proyekto di leinan konserní i entrega esakinan na Parlamento pa keda atendé.