Stephen Walroud (PAR): Den e reunion ku kontratistanan di DOK Presidente di Parlamento Thodé ta aktua étikamente kondenabel

Stephen Walroud (PAR): Den e reunion ku kontratistanan di DOK Presidente di Parlamento Thodé ta aktua étikamente kondenabel

Den e reunion di komishon sentral di 4 di aprel último, presidente di Parlamento sr. Amerigo Thode (MFK) a mustra ku e no a aktua sigur segun reglanan no skibí di étika i moral. Esaki segun parlamentario Stephen Walroud ku ta miembro di frakshon di partido PAR. Segun sr. Walroud esaki pa no unu pero pa dos rason.
E promé rason ta ku sr. Thode a keda sin informá su koleganan den Parlamento ku e mes aktivamente ta un kontratista i ku e tin un kompania ku yama Qusy N.V. ku ta laborá riba tereno di DOK. Mirando esaki no por t’asina ku e mes ta presidí e reunion unda un petishon i despues esfuersonan ta wòrdu hasí pa e kontratistanan risibí plaka di gobièrnu ya ku DOK a bai fayit i e kontratistanan a risibí solamente 50% di e plaka ku DOK tabata debe nan. Segun sr. Walroud t’asina ku e plaka ku e kontratistanan ta pidi sr. Thode tambe tin un benefisio dirèkt riba dje. Esaki ta un konflikto di interes grandi i étikamente sr. Thode no por a forma parti di e reunion i komo tal e mester a tuma distansia di e reunion i laga por ehèmpel sr. Braam dirigí e reunion na su lugá.
E di dos rason ta ku na final di e reunion sr. Thode konsientemente a keda sin duna sr. Walroud palabra, ni tampoko ora sr. Walroud a keda insistí pa haña palabra komo miembro di Parlamento. Di e manera aki sr. Thode deliberadamente a kita e posibilidat di sr. Walroud pa reakshoná riba ponensianan i akusashonnan di parti di un kontratista en partikular ku riba un forma maligno a saka sierto ponensianan ku a bin for di e frakshon di PAR kompletamente for di nan konteksto. Segun sr. Walroud e kos aki realmente no por unda un presidente di Parlamento ta hasi mal uso di su poder i ta ninga di duna un representante di pueblo skohé palabra. Kon por ta posibel ku un kontratista por yega Parlamento, bisa i reakshoná manera e ke den Parlamento i minütnan largu bati kabes di un Parlamentario aden. Sr. Thode komo presidente ta permití esaki sin komentá nada i ora e parlamentario ke reakshoná i pidi palabra, sr. Thode no ta permití esaki i ta bai asta asina leu di duna un ‘waarschuwing’ na e parlamentario pa e no wòrdu saká for di sala. Segun sr. Walroud esaki ta un mundu totalmente riba su kabes i un akto étikamente kondenabel di parti di sr. Thode.

Stephen Walroud