MAN TA KONDENA ENFATIKAMENTE KU GRUPO DI MIEMBRO DI STATEN I NAN KOLABORADORNAN TA TENE UN REUNION ILEGAL DI STATEN KOUSANDO DANO GRANDI NA NOS PAIS
MAN TA KONDENA ENFATIKAMENTE KU GRUPO DI MIEMBRO DI STATEN I NAN KOLABORADORNAN TA TENE UN REUNION ILEGAL DI STATEN KOUSANDO DANO GRANDI NA NOS PAIS
Djamars 14 di Febrüari 2017 atrobe a tuma lugá un akontesimentu reprochabel I ilegal dor di miembronan di Staten di partidonan MFK, KdNT, PS, MS I e miembro independiente E. Braam. Sin ningun outoridat ni motibu bálido e miembronan di Staten aki, asistí pa nan kolaboradornan, a tene un reunion ilegal di Staten en pugna di nos leinan di pais I di Reglamento di Órden di Staten I di e manera aki kousa daño grandi na nos pais I nos demokrasia.
Reglamento di Órden di Staten ta stipulá bou di Kapítulo VI, Tenementu di Reunion Públiko, artíkulo 64 insiso 1ku Presidente di Staten ta pone reunion ku e frekuensia ku e ta konsiderá nesesario òf ora ku tres miembro pidi pa esaki. Insiso 2 ta sigui bisa ku ta Presidente di Staten tumando en kuenta loke e Reglamento di Órden ta stipulá riba esaki dia I ora di e reunion. Insiso 3 e ora ei ta stipulá ku den kaso ku 3 miembro pidi pa un reunion di e manera preskribí, ku e ta yama e reunion denter di 14 dia.
Djaluna 13 di Febrüari 2017 11 miembro di Staten a pidi pa un reunion di Staten pa remplasá e Presidente I Vice Presidente di Staten.
Djamars 14 di Febrüari 2017, kiermen siguiente dia, Presidente di Staten Sra. Giselle MacWilliam a yama un reunion di Staten pa djabierne17 di Febrüari 2017 ku entre otro e punto di agènda ku e miembronan a pidi. Ku otro palabra, ounke e Presidente di Staten ta tin te 26 di Febrüari 2017 pa yama e reunion aki e la yam’e den 4 dia I no den 14.
Kontra tur regla I sin ningun nesesidat e 11 miembronan di Staten e ora ei a konvoká un reunion di Staten pa e mesun dia. Kiermen siendo ku ya ta tin un reunion yama e miembronan aki ku yudansa di un abogado ku a fungi tambe ilegalmente komo griffier a tene un reunion. Naturalmente e reunion aki no tin ningun balides I nada ku e keda disidí eiden tampoko. Aktuashonnan asina ta kousa daño enorme na nos demokrasia I na nos pais I ta un mal ehèmpel pa nos hubentut. MAN ta determiná di sigui bringa e desaroyonan aki i ta kondena e akto bochornoso aki.
MAN ta hasi un yamada na e miembronan di Staten konserní di reflehá I pone interes di nos demokrasia I nos pais dilanti. Nos ta apelá na pueblo pa tuma bon nota di e desaroyonan peligroso aki I pa unda ku kada un di nos por nos duna nos granito pa defendé nos demokrasia I nos pais.
E. Koots