Parti di Kaminda Helmin Magno Wiels ta haña ‘wegmarkering’ nobo

Parti di Kaminda Helmin Magno Wiels ta haña ‘wegmarkering’ nobo

Willemstad – Durante e fin di siman di 7 i 8 di aprel próksimo Helmin Magno Wiels Boulevard ta bai haña un ‘wegmarkering’ nobo na altura di e dos rotòndenan temporal. Ta bai marka e rotòndenan di nobo ku fèrf pa mas seguridat pa outomobilistanan ku ta trafiká den e area. Riba e dianan menshoná ta pidi outomobilistanan pa baha velosidat i sigui e bòrchinan ku indikashon di kua banda di kaminda por kore pa e trabounan tuma lugá na un manera seif.

E kompania Zieck Enterprices riba enkargo di Obra Públiko i Minister di Ministerio di Tráfiko, Transporte i Planifikashon Urbano, sr. Jaime Cordoba, ta responsabel pa e trabounan. Esaki ta enserá limpiamentu di e kaya pa pasa e promé lag di fèrf. Despues ta lague seka pa pasa e di dos lag di fèrf. E trabounan aki ta tuma lugá durante dia, pero no ta stroba tráfiko di manera ku mester sera e kaya.

Pa yuda hisa e seguridat den tráfiko Helmin Magno Wiels Boulevard a haña dos rotonde temporal. En espera di ehekushon di e plan total pa hasi un adaptashon kompleto di e kaminda, ta hasi mantenshon mientrastantu di e área di e rotòndenan ku fèrfmentu di e markanan. Obra Públiko ta pidi tur hende pa tene kuenta ku e trabounan ku ta tuma lugá riba e kaminda i pa kore ku koutela.

This site uses Akismet to reduce spam. Learn how your comment data is processed.

error: Content is protected !!
%d bloggers like this: