SAN NICOLAS, OUR CARIBBEAN TOWN Y NOS AGENDA PA SAN NICOLAS

“ SAN NICOLAS, OUR CARIBBEAN TOWN Y NOS AGENDA PA SAN NICOLAS !!”
Varios signatura a goberna nos Isla/pais Aruba desde introduccion di nos Status Aparte pero nos NO por conclui cu nan maneho realmente a inicia un desaroyo nobo na San Nicolas. Esaki pasobra e diferente gobierno NO tabatatin un vision real pa desaroyo di San Nicolas na prome lugar fuera di esey cu tur respet nan NO ta comprende e historia real y profundo di e districto aki como parti di nos pais.
San Nicolas a worde jama mas cu 100 anja pasa pa ‘carga nos pais’. Di un districto cu algun famia arubiano cu tabata biba grandemente di pesca y agricultura San Nicolas a drenta e epoca di ‘fosfaat’. Pa despues di e epoca aki drenta e epoca di refineria cu a trece miles di trahado di exterior di Caribe y mas pais pa traha den e refineria. E mescla aki a hasi San Nicolas e ciudad mas ‘multi cultural’ cu Aruba tabatin apesar cu den curso di tempo …..majoria districto di Aruba tambe ta basa riba un desaroyo ‘multi-cultural’ awendia.
San Nicolas tin un historia y un desaroyo basta diferente di demas districto riba nos Isla y ta den e historia aki PPA ta wak e producto di un ‘San Nicolas, Our Caribbean Town’ como un projecto pa duna e districto di San Nicolas participacion den e industria di turismo tambe. E actual gobierno y parlamento a scoge pa continuacion di e refineria pero esaki ‘transforma den un Upgrader’ sin cu realmente a hasi un estudio di e impacto di un Upgrader riba un ciudad manera San Nicolas. Pero nos ta larga e aspecto aki pa un otro articulo. Locual nos ta desea di accentua den e articulo aki ta con PPA ta mira cu por ejecuta un vision pa duna ‘San Nicolas, Our Caribbean Town’ participacion den un desaroyo nobo pa nos districto y vecindario.
‘San Nicolas, Our Caribbean Town’ ta un vision basa riba e desaroyo di San Nicolas di un ciudad keto pa un ciudad multi cultural y un asina jama ‘oil town’. Su historia, su contribuicion na e producto Aruba ta locual ta e potencial scondi di San Nicolas. Awor naturalmente e pregunta ta: Con bo ta bai projecta esaki ? Cu NO ta refleha un maneho ‘ad hoc’ pero un maneho basa riba un vision ?
1. Na prome lugar door di prepara algun sitio cu a hunga un ‘rol’ importante den curso di e historia di San Nicolas pa nos turistanan por bishita e.o. E bunker na Juana Morto locual a resta di djele……E sitio na Seroe Pretoe cu ta worde prepara tur anja pa worde decora ….. Grot di Lourdes, algun cas estilo di antes….cu por worde bishita…cierto edificio cu awor ta monumento , centro comercial di San Nicolas y nos beachnan etc
TRANSPORTACION PA DESAROYO TURISTICO DI SAN NICOLAS Y VECINDARIO:
2. Prepara un grupo di Tourbus cu lo sirbi e parti pariba di nos Isla….PPA a projecta nos idea aki for di algun anja/programa di eleccion pasa e.o. e asina jama ‘street-trolley’ pero riba wiel esta BUS trolley cu lo bishita e sitionan pariba di Brug y pasa e centro di San Nicolas pa ‘shopping’ etc.
3. Tambe PPA a projecta den nos ‘agenda pa San Nicolas’ un asina jama Sea Land Tour & Transport ‘SLTT’ cual ta un projecto pa trece turista kedando den Hotelnan p/m di lama pa San Nicolas despues di cual nan ta subi bus y move rond di San Nicolas, Savaneta y vecindario.
4. PPA ta di opinion cu cierto club cu ainda tey …manera un Bonaire Club y un Club Suriname lo mester ricibi sosten di gobierno pa mantene nan participacion den e sociedad di San Nicolas cu un inversion den e historia di esnan cu a bini pa labora riba nos Isla.
CARNIVAL VILLAGE/MUSEUM Y UN CARIBBEAN MUSIC FESTIVAL:
5. PPA ta kere cu e contribuiccion di esnan cu a inicia cu ‘Carnaval/Calypso & Soca’ta uno cu no mag bai perdi y pesey PPA ta e prome partido politico cu anjas largo a boga pa un ‘Carnival Village/Museum’ na San Nicolas.
6. PPA ta kere den crea un Caribbean Music Festival ‘CARIMU FESTIVAL’ cu tur anja lo mester por worde organisa na San Nicolas p.e. den e luna di oktober na unda tin varios anochi dedica na musica Caribense (genre) cu bandanan di Caribe presente y particpando….p.e. un anochi dedica na Bachata/Merengue etc……un anochi na Calypso/Soca y un anochi na p.e. Reagea….of otro genre musical Caribense….. Esaki lo pone cu Aruba por worde mercadea den Caribe pa e evento aki. E evento aki por bira uno….’Public/Private’ y mester tin como meta engrandese San Nicolas su participacion den nos mundo turistico y accentua herencia cultural di nos pais. Y lo mester crea espacio pa nos artistanan local por participa cu nan creatividad y naturalmente espacio pa presenta nos ‘folklore arubiano’.
7. PPA ta kere den un ‘International Golf Course’ mientras ta juda renova e actual golfcourse na San Nicolas tambe….esaki den curso di tempo por hanja maximalmente 3 of 4 hotel pero esaki den curso di 10/12 anja pa asina tene cuenta cu e crecemento di nos espacio laboral tambe. Lo hasi un esfuerzo pa asina jama ‘Health & Welness tourism’ tambe.
8. PPA ta kere den stimula un desaroyo basa riba algun ‘restaurant local/Caribense’ den San Nicolas cual lo mester ta parti di locual ta e atraccion di e districto cu e potencial aki.
9. PPA lo stimula desaroyo di un industria di arte pa henter nos isla pero nos lo accentua arte di e districto di San Nicolas.
10. PPA lo hiba un maneho unda lo hasi un ‘sales & marketing’ pa e districto di San Nicolas (por menciona cu mirando e caida di Oranjestad…esaki lo por ta necesario pa Oranjestad tambe..)
11. PPA a lanza e ‘idea’ pa pinta riba muraya na San Nicolas decadanan pasa…..PPA ta di opinion cu kada pintura lo mester ta deriva di e historia di Aruba y cu accento riba e historia/multicultural di San Nicolas.
12. PPA lo stimula construccion di un Mercado estilo Caribense cu accento riba fruta, pesca y un parti na arte, souvenir y musica local y Caribense.
13. PPA lo sostene comercio local di San Nicolas pa hana e ‘infrastructura’ necesario pa nan por funciona miho den San Nicolas y vecindario.
14. PPA lo ejecuta un asina jama ‘TRIANGULAR CULTURAL’ cu lo ta:
A. E Carnaval Village combina Museum.
B. Un Museum cu lo hiba e titulo SAN NICOLAS HISTORICAL & MULTICULTURAL MUSEUM’
C. Un San Nicolas Auditorium & Convention Center cu lo ta tin un parti for di cual un San Nicolas Business Center lo por funciona.
*** E SAN NICOLAS HISTORICAL & MULTICULTURAL MUSEUM segun PPA lo mester bira algo excepcional basa riba un Edificio construi pa e meta aki cual e diferente epoca y grupo cu a biba y crea e San Nicolas di antes lo hanja nan participacion. Ora e bishitantenan drenta e Museum aki nan lo pasa den e sigiente ‘sectornan’:
A. San Nicolas den decada 17/1800 unda algun famia humilde tabata biba como piscador y kunukero….! Cu poco investigacion lo por projecta e famianan mas bieuw di San Nicolas y unda nan tabata biba.
B. Siguidamente lo drenta un otro sector/hal di e Museum cu lo mester duna e bishitante un toke di San Nicolas den Epoca di fosfaat. Aki San Nicolas a worde indica pa ‘carga nos pais’ y a bini un 60 trahador for di e isla Corsow y Bonaire y tambe algun trahado di Europa p/m di e e compania britanico cu tabata exploita e ‘phosphaat’ aki. E periodo aki ta refleha 1876 pa 1914.
C. Despues di esaki lo drenta e sector/hal di mas grandi cu ta cuminsa cu projeccion di LAGO OIL & TRANSPORT COMPANY y e desaroyo den San Nicolas….Na unda miles y miles di trahador grandemente di Caribe pero tambe di otro pais tabata biba hunto y labora pa e refineria. E sector aki No solamente lo projecta LAGO pero San Nicolas henter. Potretnan bieuw cu por worde expande pa duna un ambiente di con E periodo aki tabata.
E sector aki lo projecta Aruba den e epoca di 1927 pa 1984…!!
ESPACIO DEDICA NA TUR !!
Locual PPA tin como e toke Caribense ta e parti cu lo duna TUR pero TUR grupo di trahador cu a bini for di nan isla/pais un espacio/skina pa projecta nan Isla/Pais den e mesun epoca aki cu e famianan cu ta descendiente di nan. E skina di kada Isla lo tin un toke especial cunele …..lo duna reconocimento na tur esnan cu a contribui na desaroyo di nos pais Aruba y San Nicolas en particular.
E Museum Historico y Multicultural aki lo duna un toke special di e cultura cu a worde treci hunto di varios lugar den Caribe y mundo pa asina crea e San Nicolas Multicultural cu e tabata y ainda tin e potencial di worde projecta como tal.
Ta e rikeza di e ‘Historia y Multicultural’ aki ta e potencial scondi pa anjas unda e diferente signatura no a realisa e potencial aki cu tin scondi parti pariba di nos Isla. PPA ta desea di duna contenido na esaki na e un forma singular. Unda nos lo nombra un commission di experto pa guia e proceso cu lo mester combersa cu famianan y pidi sosten pa ricibi documento di pasado pa asina por prepara e presentacion di e documento y projecto di historia pa asina projecta e pasado di San Nicolas.
E meta ta pa e Museum aki bira conoci den Caribe y den mercado for di unda Aruba ta trece su turistanan pa Aruba. PPA lo bin bek den un otro articulo cu mas informacion al respecto.

Aruba, 5 di april 2017 Lider Politico di PPA
BENNY NISBET

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: