Stephen Walroud (PAR): Awor si ta basta! INDEPENDENSIA PA SOLUCHONÁ PROBLEMANAN DI SCHOTTE?

Stephen Walroud (PAR): Awor si ta basta! INDEPENDENSIA PA SOLUCHONÁ PROBLEMANAN DI SCHOTTE?

Siman pasá nos a tuma nota ku lider di bloke 12 sr. Schotte a deklará den palabra bon kla ku nan meta ta pa mas lihé posibel hasi Kòrsou independiente. Na su pareser mester kaba ku kolonialismo. Pa su persona e resiente “aanwijzing’ di Reino i e redada na su kas ta prueba di esaki.
Relashoná ku esaki PAR ke trese su punto di bista dilanti. Na promé lugá Kòrsou no ta un kolonia manera ta ser sugerí. Kòrsou ta un pais outónomo ku ta disidí e mes riba tur su asuntunan ku eksepshon di defensa, asuntunan eksterior i di nashonalidat. Pues ku eksepshon di e asuntunan ariba menshoná Kòrsou ta manda den su mes kas i no Hulanda. Banda di esaki Kòrsou a drenta un kombenio ku Hulanda, ku a ser pone den Statüt, ku den tur parti di Reino mester respetá derechonan humano i e derecho di e siudadano pa por vota. Dado kaso e derechonan aki bini na peliger Reino tin ku intervení pa garantisá ku ta kumpli ku e derechonan aki.
Si nos komprondé esaki anto e “aanwijzing” ku Reino a duna gobièrnu Pisas (lesa Schotte) ta unu totalmente hustifiká i no tin nada ku haber ku kolonialismo. Basá riba nos kombenio ku Hulanda, Reino tabatin e obligashon pa sali i defendé demokrasia na Kòrsou na momento ku bloke di 12 enkabesá pa sr. Schotte kier a para elekshon i asina sera boka di pueblo.
Pa loke ta trata e redada na kas di sr. Schotte, esaki no tin nada ku haber ku kolonialismo. Hustisia a haña keho di un akto kastigabel, esta kumpramentu di un parlamentario i a hasi su trabou pa atendé ku e sospechosonan. Sr. Schotte, un konvikto, ku konstantemente i pa basta tempu kaba ta bezig ku kos dudoso i/o kriminal, awor ke laga nos kere ku esaki ta un akto kolonial. Sr. Schotte, si bo ke pa hustisia laga bo na pas, anto hasi loke bo tin un tempu kaba ta propagá, esta kambia bo bida i stòp di hasi kos mahoso i laga e pueblo aki biba na pas i den trankilidat!
E pregunta krusial ta bira ta kua ta e motibunan real ku sr. Schotte tin pa boga pa independensia. E motibu real ta ku Reino ta un estorbo grandi pa e por logra su metanan. Na promé luga sr. Schotte tin un promesa ku e a hasi na mafia, esta entregá Kòrsou den nan man. A hasi un intento na 2010-2012 pa logra esaki, pero esaki a frakasá. Nos no mester lubidá ku MFK ta un organisashon ku a ser lanta di pafó pa sirbí interesnan di pafó. Sr. Corallo, un kabesante di mafia, ta kofundador di e partido aki. Mester kumpli ku promesanan hasí na mafia sino futuro di sr. Schotte ta skur. E di dos meta di sr. Schotte pa establesé un diktadura kaminda nan por hasi i deshasí manera nan ke. Ora bo ta independiente no tin Reino mas ku por stroba esaki. Nan por para elekshon pa semper sin ku ningun hende por evitá esaki. E di tres meta di sr. Schotte ta pa evitá ku e ta bai será. Den un pais independiente nan lo tin kontrol kompleto riba hustisia i asina nan por sòru pa sr. Schotte no tin nodi kumpli ku su kondena una bes ku su posibilidatnan pa apelá agotá.
PAR nunka lo no permití sr. Schotte i su bloke di 12 pa hiba Kòrsou den un aventura di independensia djis pa solushoná su problemanan i sirbi su metanan. Pueblo por konta riba PAR pa defendé nos Pais i nos status di Pais outónomo den Reino i asina protehá nos pueblo i nos pasport Hulandes.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: