VIDEO KOMPLETU DI RUED DI PRENSA: BAN KARNAVAL 2027
Den un ambiente yen di entusiasmo, energia positivo i spiritu di Karnaval, Beehives a organisá 11 di novèmber 2026 su rueda di prensa, kaminda a presentá e kalènder ofisial, e diferente aktividatnan i preparashonnan pa temporada di Karnaval 2027.
Durante e rueda di prensa, diferente representante di instansianan i stakeholdernan envolví den organisashon di Karnaval a hiba palabra, kada un resaltando importansia di kolaborashon, kultura, tradishon i e kontribushon ku Karnaval ta duna na nos komunidat.
Presidente di Beehives, Germain Brunken, a pone énfasis riba e kompromiso di organisashon pa sigui desaroyá un Karnaval inklusivo, organisá i yen di eksperensianan memorabel pa pueblo di Kòrsou.
Un momento spesial durante e rueda di prensa tabata e palabra di un di nos baluartenan di Karnaval, Giovanni Abath kende a ekspresá su gratitut i emoshon pa e rekonosementu i dedikashon ku a wordu hasi na su nòmber. E a indiká ku ta un sintimentu masha dushi pa mira ku su kontribushon na desaroyo di Karnaval ta sigui wordu apresiá.
Kalènder i aktividatnan di Karnaval 2027.
Durante e presentashon a pasa den e diferente aktividatnan ku ta forma parti di e temporada benidero, inkluyendo e apertura, elekshonnan di Karnaval, aktividatnan pa mucha i hóbennan, Tumba Hubenil e diferente marchanan i e selebrashon final.
Beehives a resaltá ku kada un di e aktividatnan aki ta forma parti di un programa ku ta pone nos kultura, kreatividat, tradishon i partisipashon di pueblo sentral.
UN TREMENDO SORPRESA: KUMPRA UN TUMBLER I GANA E CHÈNS PA UN AUTO!
Na final di e rueda di prensa, Beehives a sorprendé e presentenan ku un anunsio spesial.
Durante temporada di Karnaval 2027, kada persona ku kumpra un tumbler di Beehives lo risibí un lot ku ta dun’é e chèns pa gana un AUTO di Dabboussi Motors!
Ku e inisiativa aki, Beehives ke duna pueblo un oportunidat ekstra pa forma parti di e selebrashon i, na mes momento, tin e posibilidat di gana un premio grandi.
Detayenan adishonal tokante e lòt, kondishonnan di partisipashon i e sorteo lo wordu komuniká despues.
GRATITUT NA NOS BRANDING PARTNERNAN
Beehives ta hasi uso di e oportunidat aki pa ekspresá un sinsero danki na tur su branding partnernan pa nan konfiansa, kontribushon i partisipashon den preparashon i realisashon di Karnaval 2027.
E sosten di nos partnernan ta di gran balor pa sigui fortalesé e organisashon i hasi e diferente aktividatnan di Karnaval posibel. Gobiernu di Kórsou, Ministerio di OWCS, CTB, CUROIL, MCB, NAGICO, DHL, ESSEX, LANDSLOTTERIJ, DABOUSSI I CURAÇAO AIRPORT HOLDING.
Tambe Beehives ta gradisí tur stakeholder, representante di prensa, grupo di Karnaval i persona ku ta kontribuí na preservashon i desaroyo di nos Karnaval.
Nos ta invitá henter pueblo di Kòrsou pa sigui e informashonnan, prepará nan mes i forma parti di un temporada yen di koló, músika, kultura, union i alegria.
Karnaval 2027… nos ta kla pa selebrá huntu!
Beehives B.V.
Organisadó di Karnaval di Kòrsou 2027
