E hende muhé ta fuertemente representá den onderstant E grupo aki mester di mas atenshon

E hende muhé ta fuertemente representá den onderstant E grupo aki mester di mas atenshon
Willemstad- Segun sifranan di CBS di 2015, tin 5616 persona ta risibí ònderstant. Pa luna e grupo aki ta risibí un montante di entre fl. 162.40 pa fl. 320.80 , dependiendo si e ta persona ku yu òf soltero.
Ta mas ku klaro ku un persona no por biba ku 320.80 florin pa luna, apesar di ta risibí supsidio di awa i koriente. Mas ainda si nos tene kuenta ku CBS ta indiká ku e stándar mínimo di bida ta di 900 florin pa luna.
Investigashon no sientífiko di Kas di Bario ta demostrá ku un grupo grandi di persona den ònderstant tin dos i asta tres generashon den ònderstant. E ta pasa di mayor riba e yunan. Otro grupo nan ta di drogadikto, eks- detenido, mamanan yòn i persona deskapasitá físikamente òf mentalmente. Te ainda e Hende Muhé ta e sekso mas fuertemente representá den ònderstant.
Ta nesesario ku gobernante nan pone atenshon na e grupo aki di bèrdat. E inisiativa pa hende ku ta kobra ònderstant, kobra awor ku karchi di bankomátiko tabata unu bon. Awor mester bini ku un maneho struktura pa garantisá ku e personanan ta sigui desaroyá nan bienestar sosial:
* Ménos hóben den ònderstant. Nos mester fasilitá entrada di nos hóbennan den e ámbito laboral. Krea mas trabou na tur nivel i den tur área. Pero tambe fleksibilisa e orario nan di trabou pa mama nan ku yu por organisá nan famia akord’é na nan orario di trabou.
* Mas persona deskapasitá físikamente i mentalmente trahando den empresanan lokal. Dunando nan aporte na nos komunidat.
* Mas prevenshon di abuso di droga i alkohòl. Uso di droga ta asotando nos komunidat. Nos mester bai invertí den tratamentu ambulante i residensial di e drogadikto. Fundashon pa Maneho di Adikshon ta hasiendo un bon trabou di prevenshon i tratamentu, gobièrnu mester sostené nan den esaki.
Huntu nos tin ku traha pa saka nos hende nan for di isolashon sosial i krea realmente bienestar sosial pa un i tur.
Ana Maria Pauletta