KOMUNIKADO DI KUERPO POLISIAL KÒRSOU Seguridat durante Semana Santa

KOMUNIKADO DI KUERPO POLISIAL KÒRSOU
118 / 2017
12 aprel 2017
Seguridat durante Semana Santa
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Manera ta kustumber e último añanan, periodo di seguridat di Semana Santa a kuminsá. E aña aki e periodo ta kore di for di 10 aprel te ku 17 aprel 2017. Den e siman menshoná lo tin hopi aktividat rònt Kòrsou. Aktividatnan ku ta resaltá i ku ta hala un públiko grandi te ku aktividatnan chikitu i den seno familiar. Pero tambe tin un kantidat di hende lokal òf turista ku ta bai Banda Abou òf pariba ku lo bishitá playanan sea pa landa, kamper, sambuyá òf simplemente kore keiru òf rilèks. Den kuadro aki polis ta anunsiá ku nos a kuminsá kontrolá èkstra den e Semana Santa aki pa loke ta trata tráfiko i riba kaminda públiko for di 10 aprel 2017. E kòntròlnan aki ta kontinuá te ku dia 17 aprel binidero pa loke ta trata e periodo ariba menshoná. Esei ta nifiká ku kada siudadano mester tin nan dokumentonan na òrdu i pa ta konsiente ku polis tin kòntròlnan intensivo i konstante. Meta: • Mantené órden públiko; • Garantisá seguridat den sentido amplio di palabra tantu pa públiko en general i turistanan ku ta di bishita riba nos isla; • Aktua di un manera preventivo i represivo rònt Kòrsou ku énfasis riba áreanan ku tin aktividat i áreanan turístiko tantu den siudat, na banda abou i den e área pariba; Den kuadro di e kontròlnan aki i e seguridat ku tantu nos tur ta boga pe, nos ke hasi un yamada na tur siudadano di e pais aki pa duna nan koperashon i sosten na e operashon aki. E pregunta ta bini e ora ei ta den ki forma un siudadano por koperá ku i sostené e operashon aki ?  Dor di tin un bon komportashon, espesialmente pa loke ta e abusu di alkohòl i manehá vehíkulo bou di influensia di alkohòl. Ta bai tin kòntròl hopi pisa i kontinuo riba e aspekto aki;  Sigui instrukshon di outoridat;  Sòru pa tur bo dokumentonan ta na òrdu;  Tuma medidanan di prevenshon pa evitá ku abo òf otro hende ta bira víktima di kualke krímen;  Yuda guia un turista na un manera ku e no ta bai resultá den áreanan di rísiko espesialmente den oranan di anochi;  Reportá i/òf mèldu kualke kos iregular ku bo nota mesora na polis na numbernan di telefòn 911 pa tur kaso di emergensia i 917 pa kaso no urgente. Ban pa un Siman Santu trankil, safe i sigur !