Detenido na Merka a bin sinta awe su kastigu na Kòrsou

Ministerio Publiko (OM):

Detenido na Merka a bin sinta awe su kastigu na Kòrsou
E hòmber S.A.H. (1968), nase na Saint Catherine (Jamaica), pero ku nashonalidat Ulandes i hopi aña bibá na Kòrsou, a keda sentensia na Estádos Unídos pa importashon di kokaina. H. a keda sentensiá 16 di desèmber 2015 dor di US District Court for the Southern District of Florida na un kastigu di 30 luna di prisòn pa importashon di 150 bolita dia 12 di yüni 2015 na momentu ku el a biaha riba un vuelo di Kòrsou pa Miami. El a keda trasladá pa un hospital na Miami na unda el a saka e bolitanan via sistema natural for di su stoma. For di dia di su detenshon e ta sera den un prisòn na Merka.
Awe, djabièrnè atardi 21 di aprel, H. a yega Kòrsou for di Miami. El a keda kustodiá pa dos polis di Divishon Krímen Organisá di KPC. 
H. a bin bek Kòrsou a base di tratado internashonal pa sinta sobrá di su kastigu den e pais na unda e tabata bibá, den e kaso aki Kòrsou. Reino Ulandes i Merka ta ámbos partido di e tratado internashonal aki. 
Den e kaso aki no ta tratá di un ekstradishon di un sospechoso, pero di un kondenando na Merka u ya kaba a keda sentensiá. El a hasí, a base di e tratado, un petishon pa sinta sobrá di su kastigu na Kòrsou. Ámbos pais, despues di análisis profundo, a bai di akuerdo ku esaki. E meta di e interkambio aki ta resosialisashon di H.
Pronto H. ta keda presentá na un wes na Kòrsou. Esaki a base di un demanda di Prokuradó-general (PG) pa ehekushon di e kastigu ku el a risibí den eksterior. E kastigu merikano lo keda, a base di hechos i sirkunstansianan, transferí pa un kastigu di Kòrsou, esaki a base di kriterio, pa e sinta sobrá di su kastigu aki nan. Hof ta disidí finalmente riba esaki.