Ahedresistanan Taqesyah Marcos i Fréderic Simonis ta saka kara di Kòrsou na Jamaica.

Ahedresistanan Taqesyah Marcos i Fréderic Simonis ta saka kara di Kòrsou na Jamaica.

Nos ahedresistanan Taqesyah Marcos i Fréderic Simonis tur dos a logra sali na di dos luga entre e miho ahedresistanan hubenil den Karibe. Nan a gana dos premio representando Kòrsou durante e di seis Carifta Junior Chess Championships na Jamaica. Carifta sukampionatonan di ahedres na Jamaica a tuma luga durante mes periodo ku Carifta di atletismo na Kòrsou i Carifta di natashon na Bahamas.
No menos ku 220 hoben di 6 diferente pais a kompeti na Carifta su kampionatonan hubenil di ahedres ku a tuma luga e aña aki di 14 pa 17 di aprel den e suidat Kingston na Jamaica. E kantidat di ahedresistanan ku a partisipa na e evento ta hasi e kampionatonan di ahedres hubenil aki esun di mas grandi di Carifta pa ahedres te ku awor.
E kampionatonan di ahedres a keda reparti den 3 grupo absoluto U20, U16 i U12 i den 3 grupo femenino U20, U16 i U12. Den e 3 gruponan absoluto i femenino tin repartishon tambe di premionan pa e kategorianan di edat U18, U14, U10 i U8.
Kòrsou a keda representá pa e sinku ahedresistanan Dylan Mathilda U20 absoluto, David Pietersz U16 absoluto, Mariana Sanchez U16 femenino, Taqesyah Marcos U16 femenino i Fréderic Simonis U12 absoluto, kendenan tabata bou di guia di Alvin Smith i Jimmy Izijk.
Dylan Mathilda a kompeti den e grupo sumamente fuerte U20 absoluto ku ta tin 2 maestro di FIDE. Apesar di esaki Dylan a score 4 punto for di 7 wega, pèrdiendo 1 wega so, empatando 4 wega i ganando 2 wega.
David Pietersz kende a hunga un bon papel durante Carifta na Barbados den 2015, ganando medaya di oro den kategoria di edat U14, ta tin`e mas difisil e aña aki, mirando ku ta tin 56 partisipante den e grupo U16. David a score 4.5 punto for di 7 wega i e tambe ta pèrde solamente di 1 kontrinkante.
Taqesyah Marcos di 12 aña hungando fuertisimo den kategoria femenino U16 a score 5 punto for di 7 wega, lokual tabata sufisiente pa gana e di 2 premio.
Mariana Sanchez di 15 aña a partisipá den mes grupo U16 huntu ku Taqesyah Marcos i nan dos mester a enfrenta otro durante e ultimo wega. Mariana ta kaba ku 3.5 punto for di 7 wega pèrdiendo ku algun hungadónan fuerte di entre otro Jamaica i Barbados. Mariana por a sali na di 3 luga si e a logra gana su ultimo wega, pero Taqesyah a logra bai ku e punto pa kaba na di 2 luga.
Pa Fréderic Simonis di 9 aña tabata su prome enkuentro internashonal i e mester a hunga den e grupo di mas grandi ku 85 partisipante di kua 4 kandidato pa maestro. Esakinan no tabata un intimidashon pa Fréderic ku a keda optimista for di komienso te final i ta logra score 5.5 punto for di 7 wega pa kaba na di 2 luga den kategoria U10.
E Federashon di Ahedres Korsou (FEDAKO) ta sumamente satisfecho ku e preparashonan adelantá di nos hobenan i tambe ku e sinku di nos ahedresistanan a logra gana dos premio representando Kòrsou.
Nos partisipashon na Carifta su kampeonatonan hubenil di ahedres sin duda tabata un bon eksperensia pa nos hóbenan, kendenan a demonstrá e otro paisnan karibense ku debidamente mester tene kuenta ku Kòrsou.

This site uses Akismet to reduce spam. Learn how your comment data is processed.

%d bloggers like this: