PNP ta aportá tambe riba e aria di deporte i kultura.

PNP ta aportá tambe riba e aria di deporte i kultura.

Willemstad – Partido Nashonal di Pueblo (PNP) ta konvensí i di akuerdo ku un di e manera nan pa prevení i kombatí kriminalidat ta pa promové deporte bou di nos pueblo i mas ahun bou di nos hóbennan. Pero nos sa tambe ku loke a impedí gobièrnu pa hasi esaki ta e falta di fondo ku tin tur aña di nobo pa por ehekutá entre otro e proyektonan deportivo. Te hasta ku ora buta prioridat lo mester di mas sèn pa ehekutá proyektonan ku no ta forma e prioridat pa e aña konserní.

Manera PNP ya a bin ta informá den su komunikadonan ku e entrada di gobièrnu no ta sufisiente.
Otro reto ku gobièrnu nan tabata tin i te ainda tin ta e echo ku no tin un maneho deportivo konkreto i konsiso ku ta kubri tur aria di un forma integral.
Esaki a buta tambe ku tabata i ta masha difísil pa maneho di deporte haña prioridat den gobernashon.
Pa e motibu aki tambe PNP ta kontentu ku ainda tin organisashonnan deportivo ku a sobrebibí bou di e sirkunstansianan miserabel ku nan mester funshoná den dje. Esaki mirando e echo ku nan no ta haña supsidio di gobièrnu riba un base struktura òf nan no ta haña supsidio at all. Pa e motibu aki PNP ke for di aki gradesí tambe tur e instansianan priva ku basa riba nan sentido i deber moral, ta yuda via di sponsorship organisashon deportivo finansieramente pa nan por realisá nan ophetivonan.
Pa solushoná e problema di fondo aki nos mester pensa riba alternativanan mas struktura i permanente. Un gritu di finansiá deporte via fondo di kriminalidat por ehèmpel lo no yuda e kousa. Esaki ta algu temporal i ku lo hiba e deportista un bia mas na desepshon.
Komunidat di Kòrsou mester ta na altura ku den añanan “70” PNP a papia hopi di e asina yama 1 sèn pa deporte ku mester a bini dor di kobra 1 sèn riba kada liter di gasolin. Te hasta awe esaki no a wòrdu ehekutá. Un di e motibunan tabata e echo ku Kòrsou tabata den e struktura di Antia.
PNP den e persona di Humphrey Davelaar komo diputado di gobièrnu di Teritorio Insular di Kòrsou, enkargá ku ENERGIA a proponé den e temporada ei pa CUROIL retené 3 sèn riba kada liter di gasolin bendí i pa pone den un fondo pa deporte. Curoil a kumpli ku e petishon aki i e fondo den korto tempu a produsí mas o ménos 5 milon florin.
Despues di e struktura nobo na 10 -10 – 10 kaminda e gobièrnu nobo a sinta no a tende mas di e fondo aki. E fondo i tambe e sèn a disparsé. Despues di tempu na un dado momentu Sr. Davelaar a hasi informashon di e fondo i bin komprondé di Curoil ku e fondo tei pero esaki ta bashí, e plaka a evaporá. Tambe mester menshoná ku Sr. Davelaar a logra un akuerdo entre Curoil, Aqualectra i Refineria di Kòrsou pa pone anualmente un suma di 225 mil florin na disposishon di SEDREKO pa asina supsidiá awa i koriente di e diferente lokalidatnan deportivo. E inisiativa aki tambe tambe a evaporá.
Basa riba e eksperensia nan AMARGO aki Partido Nashonal di Pueblo ta di opinion ku:
• mester bolbe aktivá e maneho ku Sr. Davelaar a introdusí pero e biaha aki mester hinka esaki den un lei (Landsverordening) den kual ta instituí formalmente un fondo di Deporte – Kultura pues un (landsverordening tot het oprichten van SPORT en CULTUUR FONDS).
• PNP lo proponé tambe ku tur kompanianan (NV s) di Gobièrnu lo depositá un montante den e fondo enkuestion.
• PNP lo hasi un estudio konkreto riba e konsekuensia ekonómiko ku introdukshon di un subida di impuesto riba kombustibel ku e destinashon pa DEPORTE i KULTURA lo por tin. Esaki lo por wòrdu inkorporá den un “Landsverordening Bestemmingsheffing op benzine/diesel”.

PNP ta di opinion ku esaki ta e úniko manera pa por supsidiá e proyektonan riba e aria di deporte i kultura riba un base struktura i fiho sin ku mester dependé riba e fondo nan disponibel di gobièrnu. Ta e manera aki ta e manera responsabel i duradero pa solushoná retonan ku nos pais ta konfrontá, paso ABO ta na promé lugá !!