GOBIÈRNU DI KÒRSOU TA INVITÁ PUEBLO EN GENERAL PA DEN UNION KONMEMORÁ E VÍKTIMANAN DI SEGUNDO GUERA MUNDIAL
GOBIÈRNU DI KÒRSOU TA INVITÁ PUEBLO EN GENERAL PA DEN UNION KONMEMORÁ E VÍKTIMANAN DI SEGUNDO GUERA MUNDIAL
Willemstad – Djaweps 4 di mei próksimo pa 9’or di mainta, durante un seremonia solemne na monumento di guera “Monument der Gevallenen” na Waaigat, ta konmemorá esnan ku a pèrdè nan bida den Segundo Guera Mundial. Riba e fecha aki ta duna respèt na, i rekordá tur militar i sivil ku durante e temporada di guera, mishonnan di pas di organisashonnan internashonal òf na man di teroristanan, a bin pèrdè nan bida.
Promé ku e seremonia kuminsá na Waaigat armada ta marcha di parti pariba, na haltura di Citco, bini te na e monumento. Despues di yegada di e Komandante di Marina Real den Caribe, Komandante di VKC, Promé Minister i su Ekselensia Gobernador, e seremonia ta kuminsá ofisialmente.
E akto di 4 di mei pa konmemorá e viktimanan di guera ta unu di sumo importansia, pa motibu ku den lus di sustu i tristesa kousa pa Segundo Guera Mundial komunidat internashonal a disidí ku ningun hende, hamas, mester falta ‘E Derecho di tin Derecho’. Pa duna forma moral i forsa legal na esaki, a buta balor humano den palabra i ankra esaki den e derechonan fundamental di hende. Di e forma aki e Deklarashon Universal di Derecho Humano a keda aprobá na 1948, huntu ku e Dekreto Europeo di Derechonan Humano na 1950 i e Tratado di Refugiado na 1951.
Si nos wak aktualidat, nos ta mira ku e tratadonan aki, sin kita sin pone, ta di sumo importansia.
Mirando e importansia di e konmerashon aki, Gobièrnu di Kòrsou ta invitá pueblo en general, i espesialmente desendientenan di personanan ku a sirbi pais den guera i ku a pèrdè nan bida pa nos ta liber awe, pa sali kas mainta riba 4 di mei 2016 i bini Waaigat pa den union konmemorà e viktimanan di Segundo Guera Mundial.
