KOMUNIKADO DI KUERPO POLISIAL KÒRSOU Polis ta pidi yudansa di komunidat
KOMUNIKADO DI KUERPO POLISIAL KÒRSOU
140 / 2017
3 mei 2017
Polis ta pidi yudansa di komunidat
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Djaluna 3 di aprel 2017 alrededor di 09.39 or, Sentral di Polis a dirigí un patruya na Kaya Hematita pa un kaso di tiramentu. Na yegada di e patruya nan a bin topa ku un hòmber – ku despues a resultá ku ta e habitante di e kas- drumi abou den balkon patras di e kas ku no tabata duna señal di bida. Un investigashon mas profundo na e kurpa di e víktima a resultá ku e tabatin herida di bala na e parti ariba di su kurpa. For di un investigashon preliminar ku polis a realisá na e sitio a resultá ku un outo kolo shinishi a kore drenta den kura di e kas i a pasa bai patras di e kas. Einan tres(3) hòmber, dos(2) di nan kara tapa i unu ku un pèchi bisti a baha for di outo i a bai den e kas i a menasá tur hende presente ku arma di kandela. E sospechosonan a asta agredí un mucha menor di edat i un di e abitantenan. Despues di esei pa un motibu te ainda deskonosí, bala a kai i a alkansá un habitante di kas. E víktima aki a risibí tiru den e parti ariba di su kurpa i a fayesé na e sitio mes. E sospechosonan a kue algun pertenensia di e víktima i kore Sali for di e kas pa despues hui for di e sitio den un outo marka VITZ kolo shinishi (wak imágen/potrèt).
Kontinuando ku e investigashon den e kaso aki, djárason 12 di aprel 2017, alrededor di 23.45 or, Tim di Aresto a detené un (1) sospechoso na un kas den Kaya Ehèmber, relashoná ku e kaso dI ladronisia ku violensia ku morto na Kaya Hematita, kual a tuma lugá dia 3 di aprel último (komunikado di prensa 101/2017). Ta trata di e hòmber: Ch.V.E.K. 27 aña di edat, nasé na Kòrsou.(e sospechoso ku e pèchi di beisbòl bisti) Tim di Aresto di polis a tene entrada hudisial den dos (2) kas respektivamente na; Kaya Ehèmber (Montaña’bou) kaminda e sospechoso ta biba i na Kaya Kalsit (Fortuna’bou). Durante di investigashon den e kasnan ariba menshoná, Polis a konfiská algun artíkulo ku ta importante pa e investigashon.
POLIS TA PIDI BO YUDANSA PA DETENÉ E OTRO DOS(2) SOSPECHOSONAN KU TA RIBA E IMÁGENNAN /POTRÈT. SI BO REKONOSÉ UN DI E HÒMBERNAN AKI NOS TA PIDI BO PA YAMA NA TELEFÒN 8666141 – 917 OF E NUMBER ANÓNIMO 108 (BO ANONIMIDAT TA GARANTISÁ)
