Gobièrnu ta otorgá plaka di rekonosementu na e hóben Natanaël Maria pa su akto heroiko

Gobièrnu ta otorgá plaka di rekonosementu na e hóben Natanaël Maria pa su akto heroiko

Willemstad – Dia 2 di aprel último, e hóben siudadano Natanaël Maria a hasi un akto heroiko, momento ku el a bula den laman, pa skapa bida di un otro siudadano.
Na hopi okashon, ta dediká atenshon na e kosnan negativo ku hóbennan den komunidat ta hasi, miéntras ku kosnan positivo manera esaki, no ta haña e atenshon i publisidat nesesario.
Ta pa e motibu aki mes ku Promé Minister alabes Minister di Hustisia, sr. Gilmar Pisas, na nòmber di Gobièrnu di Kòrsou ta hasi entrega di un plaka di rekonosementu na e hóben Natanaël Maria.
Hóbennan manera Natanaël Maria meresé e atenshon i publisidat nesesario, p’asina demas hóben den komunidat tuma nota ku un akto positivo sigur tin mayor impakto. Pasobra komunidat kompleto sigur ta aploudí lokual Natanaël Maria a hasi pa su próhimo.
Den e preparashonnan pa duna e rekonosementu aki na Natanaël Maria, gobièrnu a bin komprondé ku Natanaël Maria ta un aspirante agente polisial, lokual ta un indikashon ku den Natanaël Maria, sigur Kòrsou tin un hóben ku kier sirbi su pais i su próhimo, lokual nos mester ta orguyoso di dje.
Manera un renglon di nos himno nashonal mes ta bisa:”nos bida lo ta poko pa duna nos pais”. Natanaël Maria na momento di su akto a demostrá esaki, pasobra Natanaël Maria niun momento so no a para ketu na e peliger ku e mes tabata kore, ora ku el a bula na laman pa skapa bida di un otro persona ku ya tabata den peliger.

P’esei ta ku hopi honor ku Promé Minister sr. Gilmar Pisas na nòmber di Gobièrnu di Kòrsou, a hasi entrega di un plaka di rekonosementu na e hóben Natanaël Maria pa su akto heroiko.

This site uses Akismet to reduce spam. Learn how your comment data is processed.

%d bloggers like this: