Awe riba dia Mundial sin tabako, ban bisa no na tabako: TABAKO TA UN MENASA PA TUR HENDE

Awe riba dia Mundial sin tabako, ban bisa no na tabako: TABAKO TA UN MENASA PA TUR HENDE

WILLEMSTAD — Awe dia 31 di mei 2017 ta Dia Mundial sin tabako. Aki na Kòrsou nos tambe ta para ketu riba e fecha aki ku tantu Pan American Health Organization komo World Health Organization ta pone atenshon ariba. Ta konosí ku tabako ta hasi daño grave na salú di tantu esnan ku ta huma i komo esnan eksponé na e huma di otro nan sigur tambe muchanan.

Tabako ta keda un menasa grandi pa salú di pueblo. Tambe ta konosí ku uso di tabako ta mata mitar di personanan ku ta humadó ferviente. Ta un sekreto públiko ku 80 % di esnan ku ta fayesiendo dor di bisio aki ta bini di paisnan pober òf hendenan ku tin entrada medio. Awe ta 31 di mei dia mundial kontra tabako i ta p’esei e eskoho di Organisashon Mundial di Salú pa e tema aña aki ‘Tabako, un menasa pa tur hende’. E tema ta reflehá e menasa ku tabako ta pa e desaroyo i bienestar di nos tur.

Parlamentu di Kòrsou a pasa un lei ku ta prohibí pa huma den espasionan sera. E lei aki a drenta na vigor for di aprel 2016. Den kuadro di esei, Ministerio di GMN ta preparando banda di e kampaña publisitario, pero tambe implementashon di e lei aki. Algun echo di tabako ta ku sigaria ta kousa mas ku 7 mion morto pa aña i segun kálkulonan esaki lo por krese i yega te na 8 mion na aña 2030. Banda di esaki, uso di tabako ta pone un preshon enorme riba e kostonan di kuido médiko i ta baha produktividat.

Ban para ketu awe riba dia Mundial sin tabako i ban stop di usa tabako i ta konsiente sigur di e daño ku esaki ta okashoná na nos kada unu.

This site uses Akismet to reduce spam. Learn how your comment data is processed.

%d bloggers like this: