CBCS su di dos konferensia anual di fintech ta trese eksperto finansiero i reguladó huntu pa fomentá inovashon / Pa yuda empresa inovativo den sektor finansiero nabegá den e kuadro regulatorio CBCS ta lansa Innovation Office

CBCS su di dos konferensia anual di fintech ta trese eksperto
finansiero i reguladó huntu pa fomentá inovashon

WILLEMSTAD/PHILIPSBURG – Dia 21 i 22 di novèmber 2024, Centrale Bank van Curaçao en Sint
Maarten (CBCS) a tene su di dos konferensia anual di fintech na su ofisina na Willemstad. Tema
prinsipal di e konferensia tabata ‘Payments Evolution & The Crypto Maze’ (Desaroyo riba tereno di
pago i e laberinto di kriptomoneda). Eksperto di tur parti di mundu a bini huntu pa papia i hasi
presentashon riba un variedat di tópiko relevante.
‘Ku e konferensianan akí, CBCS ke trese e profeshonalnan di sektor finansiero i e reguladónan
huntu pa papia tokante e desaroyonan prinsipal riba tereno di inovashon i teknologia di merkado
finansiero,’ asina Richard Doornbosch, presidente di CBCS, a splika den su introdukshon. ‘E análisis
inisial ku nos a publiká resientemente, The Rise of Financial Technology in Curaçao and Sint
Maarten, ta mustra ku tin un kantidat konsiderabel di empresa nobo riba tereno di teknologia
finansiero (fintech) i un kresementu rápido den aktividat di fintech, spesialmente na Kòrsou.’
Un variedat di oradó i eksperto a papia riba e desaroyonan den sektor di pago. Algun di e tópikonan
ku e panel a trata ta: ‘the good, the bad and the ugly’ riba tereno di kriptomoneda, instrumento
nobo pa regulashon i supervishon, i transformashon di Kòrsou den un sentro regional di fintech.
Tabatin un gran variedat di oradó- i panelista, representando Interamerican Development Bank,
Banco Central de la República Dominicana, Centro de Innovación Financiera Costa Rica, Curaçao
Fintech Association, Digital Hub Americas, Dutch Caribbean Securities Exchange, Girasol, CXPay,
Zinica Group, Emerging Horizons, PGM Capital i Simplexxis, komo tambe eksperto di CBCS mes.
CBCS su propio tim di fintech a tene un presentashon riba e resultadonan prinsipal di su análisis
inisial i a lansa CBCS su Innovation Office ku ta yuda empresa inovativo komprondé kon pa
funshoná den e kuadro regulatorio eksistente.
Teknologia finansiero ta birando kada bes mas importante pa sektor finansiero di nos islanan, pa
e ekonomianan lokal i pa Banko Sentral. Un di e ophetivonan di Banko Sentral ta di kontribuí na un
sistema finansiero sólido i stabil. P’esei, ‘CBCS a prepará un plan di akshon ku vários paso konkreto
ku lo mester kontribuí pa negoshi di fintech por subi merkado finansiero lokal na un manera
organisá i sin problema, i tambe duna e profeshonalnan i públiko en general transparensia i
konosementu relashoná ku e aktividatnan di fintech na Kòrsou i Sint Maarten,’ Sr. Doornbosch a
splika.
Doornbosch a splika tambe ku, awor ku e produkto- i servisionan finansiero ta birando mas i mas
digitalisá, sektor finansiero ta birando mas efisiente i inklusivo, ya ku teknologia ta yuda redusí
kosto di manera ku e servisionan finansiero ta bira mas pagabel i aksesibel, tantu pa kas di famia
komo pa negoshi.
El a terminá bisando ku ya kaba sektor di fintech na Kòrsou ta muchu mas grandi ku loke lo bo
spera a base di e ròl ku e tin den e ekonomia lokal so. ‘Esaki ta pone bo pensa ku kisas e isla akí ta
na punto di bira un sentro regional di fintech. Pa hopi dékada, Kòrsou a fungi komo sentro
internashonal pa atministrashon di fondo di invershon i, na e momento akí, tin indikashon ku
Kòrsou su sektor finansiero ta avansando pa yega e siguiente nivel.’
Aproksimadamente 175 stakeholder, representando un variedat di área profeshonal, tabata
presente na e konferensia di dos dia i a kontribuí na debate animá durante e seshonnan di pregunta
i kontesta. E diskurso kompleto di Sr. Doornbosch a hasí durante e konferensia ta disponibel na
https://www.centralbank.cw/publications/speeches-presentations.
Willemstad, 23 di novèmber 2024
CENTRALE BANK VAN CURACAO EN SINT MAARTEN

 

---

 

Pa yuda empresa inovativo den sektor finansiero nabegá den e kuadro regulatorio
CBCS ta lansa Innovation Office

WILLEMSTAD/PHILIPSBURG – Centrale Bank van Curaçao en Sint Maarten (CBCS) tin e
plaser di anunsiá apertura di su Innovation Office. E tim akí ta dediká na yuda e empresanan
inovativo den sektor finansiero komprondé kon pa funshoná den e kuadro regulatorio eksistente.
CBCS su Innovation Office lo sirbi komo punto di kontakto pa empresa ku ta ofresé inovashon
finansiero. E lo fomentá diálogo, konsulta i kolaborashon entre CBCS i tur ku ta desaroyá inisiativa
teknológiko relashoná ku produkto, servisio i modelo empresarial riba tereno finansiero. Ademas,
e lo sirbi komo plataforma pa eksplorá i interkambiá riba e tendensia- i desaroyonan nobo den e
sektor ei. Por tuma kontakto ku Innovation Office via e siguiente página dediká di CBCS:
https://www.centralbank.cw/innovation-office.
Innovation Office t’ei pa garantisá ku un inovashon por subi merkado finansiero sin difikultat i
kumpliendo ku e reglanan aplikabel. Fuera di esei, Innovation Office mester kontribuí na mas
inklushon finansiero, transparensia i kompetitividat riba merkado finansiero, i mas protekshon di
konsumidó. Innovation Office t’ei pa asistí tantu empresa regulá komo esunnan no regulá i tantu
empresa lokal komo internashonal.
E tim di Innovation Office ta konsistí di spesialista di fintech ku perisia riba tereno di teknologia
finansiero, inovashon i aspekto regulatorio. Ku e konosementunan akí, kombiná ku avanse
teknológiko, nan ta yuda empresario i negoshi komprondé kon pa funshoná den e kuadro
regulatorio vigente i kumpli ku e rekisitonan.
Lansamentu di Innovation Office ta parti di CBCS su strategia pa atendé ku e fluho kontinuo di
inovashon ku ta presentando, spesialmente den e área di teknologia finansiero. Den su Market
Analysis on Financial Innovation in Curaçao and Sint Maarten,1 CBCS ta konstatá un oumento den
aktividat i inovashon den sektor di Fintech na Kòrsou i Sint Maarten. Esaki ta impulsando desaroyo
di produkto, servisio i modelo empresarial nobo i transformando e struktura di merkado.
CBCS ke kontribuí na un sistema finansiero stabil, sigur i efisiente, kaminda e konseptonan
inovativo ku ta subi merkado ta generá servisio finansiero ku ta sostenibel i aksesibel pa un i tur.
P’esei, CBCS ta konsiderá ku ta importante pa monitoriá desaroyo di produkto i servisio finansiero
i modelo empresarial basá riba teknologia, pa esei sosodé riba un ritmo konstante i na un manera
responsabel.
Willemstad, 23 di novèmber 2024
CENTRALE BANK VAN CURAÇAO EN SINT MAARTEN