MEHORASHON DI SERVISIO NA OFISINA DI REIBEWEIS TA DJIS TRAS DI PORTA

MEHORASHON DI SERVISIO NA OFISINA DI REIBEWEIS TA DJIS TRAS DI PORTA
Willemstad – Siman pasá atrobe tabatin ekspreshonnan di malkontentu pa ku e servisio na Ofisina di Reibeweis. Klientenan, prinsipalmente despues di dianan liber, ta eksperensiá ku e tempu di espera ta largu. Sinembargo, e problema aki, entrante luna di yüli benidero, lo ta algu di pasado.
Ministerio di Maneho di Gobernashon, Planifikashon i Servisio Públiko a revisá e diferente prosesonan na Ofisina di Reibeweis. Na e momentunan aki, bou di responsabilidat di Minister Armin Konket, ta hasiendo e adaptashonnan nesesario, pa asina alsa e kalidat di servisio hasiendo e servisio mas mihó i rápido.
E solushon ta enserá na promé lugá, separashon físiko di e parti di pasa eksamen (parti dilanti di e proseso) for di e parti atministrativo di sakamento di e karnet di reibeweis (ku ta parti patras di e proseso). E parti di pasa eksamen teorétiko i práktiko pa reibeweis lo keda na Sta. Rosaweg. Aki skolnan i instruktornan di lès di reibeweis lo sigui bai pa kumpra ‘stortingsbewijs’, ‘commissieverklaring’, tuma fecha pa eksamen, kambia fecha pa eksamen, etc.
E parti di atministrativo ta bai Otrobanda na un ofisina patras den kurá di e edifisio di Kranshi. Na Kranshi klientenan lo mester bai pa: saka karnèt di reibeweis pa promé bia despues di eksamen práktiko, renobá reibeweis, kambia reibeweis stranhero pa unu di Kòrsou, saka uitreksel di reibeweis, etc.
Otro parti di e mehorashon di e nivel di servisio na komunidat ta e echo ku lo bai traha ku e sistema di traha sita. Spesialmente pa hasi uso di servisio di renobá òf kambia reibeweis. Esaki ta komparabel ku e sistema aktual pa renobá òf kambia
pasport i sédula. Pa saka reibeweis pa promé e bes no tin nodi di traha afsprak. Djis ‘walk-in’.
Minister Armin Konket tabata di bishita na Ofisina di Reibeweis i por a tuma nota di e situashon ku tantu pa públiko komo pa e trahadónan na e ofisina ta desagradabel. P’esei e minister ta satisfecho di tuma nota di e avanse di e trabounan ku a bini ta tuma lugá. Djis algun siman mas i tantu e kliente, komo e ámtenarnan konserní lo por respektivamente tuma i duna servisio bou di kondishonnan muchu mas adekuá.