Deporte, un medio pa forma “hende” i “futuro deportista”
Deporte, un medio pa forma “hende” i “futuro deportista”
E nivel di partisipashon aktivo den deporte i moveshon na Kòrsou ta 36,2%. E partisipashon pasivo na deporte i moveshon ta 38,4% kual ta mas haltu ku e partisipashon aktivo. Di e 38,4% solamente 18% ta praktiká deporte diario, mayoria (69,1%) ta praktiká deporte i moveshon un (1) bia pa siman. Esaki ta segun e “Participatie Onderzoek” hasí na 2016 dor di CBS. Aña 1999 e porsentahe di partisipashon aktivo tabata 32,4%. Esaki ta demonstrá ku e maneho nashonal anterior i vigente pa ku deporte a realisá un kresementu di 3,8 dentro di 17 aña. Kòrsou tin e reto pa bin ku un maneho efektivo i efisiente pa logra e meta ku gobièrnu a stipulá di “75% di nos poblashon ta praktiká deportá i moveshon komo aktividat diario”òf kisas konsiderá di adaptá e meta profundisando kiko deporte i moveshon ta aportá na dje.
Deporte tin e abilidat pa forma hende
Ku eksepshon ku famianan kaminda deporte i moveshon ta un pilar di bida, mayoria mucha nan promé enkuentro ku deporte (òf edukashon físiko) ta na skol. Maestronan (den edukashon físiko) tin e tarea di duna hóbennan e fundeshi ku ta desaroyá abilidat kognitivo, físiko i mental, e base i abilidat pa praktiká i kompetí den diferente deporte. Si esaki wòrdu hasí na un manera inspirativo hóbennan ta hasi deporte i moveshon mas lihé ku un meta klave den nan bida diario. Hóbennan ta sinti mas nesesidat pa praktiká deporte i lo sigui hasi esaki den bario, e di dos enkuentro ku deporte i moveshon kaminda talento ta wòrdu diskubrí i prepará pa e kaminda pa éksito.
Deporte no solamente ta duna un aporte na un komunidat sano pero ta un medio pa forma “hende”. Práktika di deporte ta konsistí di lèsnan pa bida, hisa konfiansa propio, dominio propio, desaroyo di karakter, siña kolaborá, perseverá i tambe un medio ku ta trese union.
Deporte den bario, kaminda nos futuro deportista ta forma
Na Kòrsou e deporte mas visibel ta Beisbòl. Internashonalmente Kòrsou a wòrdu marká komo e isla ku ta produsí mas Mayor League Players kompará ku e kantidat di habitante. Den futbòl tin mas ku 35 futbolista profeshonal internashonal sin konta esnan den liga di Kòrsou. Kòrsou tin diferente profeshonal mas den otro ramo di deporte. Algun mas konosí ta den atletismo, tènis, Mixed Martial Arts, Yudo, Body-building i asina tin mas.
Kòrsou, chikitu na tamaño, grandi na potensial deportivo
Tin un kantidat di por lo ménos 11.000 deportista i dirigente (boluntario) partí den mas ku 40 federashon nashonal, tur representando un ramo di deporte diferente. E federashonnan aki ta organisá kampionatonan nashonal pa deportista i pueblo di Kòrsou partisipá i ta partisipá den region (Karibe) ku prestashonnan prestigioso. Kòrsou tin mas di 50 hende ku a destaká komo deportista, dirigente deportivo – atministrativo, – tékniko, wes òf coach. Te ku aña 2014 esaki ta konsistí di 15 deporte: atletismo, basketbòl, beisbòl, body-building, esgrima, futbòl, karate, natashon, peso, sailing, sòftbòl, tiru, tènis, tènis di mesa i vòlibòl.
Un deporte “Artistic Gymnastics” ku no tin federashon a sa di bin kas ku 66 medaya ku hóbennan ku apénas a praktiká e deporte pa 5 aña. Artistic Gymnastics tambe ta forma parti di e 10 deportenan mas praktiká. Esaki ta un otro ehèmpel ku Kòrsou su poblashon tin abilidat natural pa destaká den deporte.
Kongreso di deporte 2017
Pa tin un Kòrsou aktivo, salú i patriótiko, kual ta e título di nos maneho di deporte 2013-2017 e siguiente maneho pa 2018 – 2020 meresé atenshon pa un ehekushon optimal kaminda ta tene na kuenta e historia, eksperensia i potensial ku Kòrsou ta demonstrá riba tereno di deporte i lokual deporte por nifiká pa e nashon Kòrsou.
Pronto mundu deportivo lo wòrdu invitá pa forma parti di e promé kongreso di deporte organisá pa FDDK, unda huntu nos ta duna aporte na e siguiente maneho di deporte i hasi nos soño bira realidat.
Skibí pa Naïsha Santiago, Quality & Research Executive