Kampionato Lipo Elhage RBI Senior League patrosiná pa MCB kla pa inisiá

Kampionato Lipo Elhage RBI Senior League patrosiná pa MCB kla pa inisiá

 

WILLEMSTAD – Curaçao Baseball Development Foundation (CBDF)  huntu ku spònser prinsipal Maduro & Curiel’s Bank (MCB) ta sumamente orguyoso pa anunsiá inisio di e kampionato di RBI Curaçao.     Despues di e periodo ku tur ekipo, hungador i coach nan partisipante por a registra online via e sistema di League Apps, tur kos ta kla pa e di ocho edishon di RBI Curaçao bou di CBDF i ku sosten un biaha mas di MCB.

E aña aki atrobe e kampionato ta dediká na hóbennan di 16 pa 18 aña di edat. E peloteronan aki lo kompetí den e divishon di Senior ku partisipashon di 6 ekipo. E kampionato un biaha mas lo bai ta bou di enkargo di Fundashon pa Nan i e kuerpo di umpire/scorer lo ta bou di direkshon di Edaine ‘Dinky’ Cannister. Tur e weganan lo tuma luga na Tio Daou Ballpark.

 

Manera a indiká kaba un total di 6 organisashon lo bai forma parti di e kampionato aki, entre otro    Groot Kwartier Astros, Marchena Braves, Royal Scorpions Cardinals, Wild Cats/St. Michiel Dodgers,   Sta. Rosa Indians i Sta. Maria Pirates. E kampionato aki ta un oportunidat pa mas ku 100 hóben di edat menshoná hunga nan deporte faborito di beisbòl den un periodo ku normalmente nan ta para ketu. Hungando sigur minimaal 12 wega mas, sin duda ta yuda ku desaroyo di nan wega i esaki ta e meta prinsipal di CBDF.

 

E aña aki CBDF a logra den koperashon ku MCB pa selekshon di Curaçao RBI Senior League tabata presente na Vero Beach, Florida pa kompetí den e torneo Nike RBI World Regional. Nos selekshon di RBI Senior a sa di gana e Nike RBI World Regional Tournament i a bai representa e region International durante e Nike RBI World Series, kual tambe a tuma lugar na Vero Beach, Florida.                                       Importante ta ku un grupo nobo di hóben ta haña oportunidat pa saboriá e eksperensia di representá nan pais i kompetí internashonalmente.

 

Manera tur aña weganan di RBI Curaçao 2023 por keda sigui di forma digital via iScore i tambe por bishita e website www.rbicuracao.com, unda por haña tur informashon i resultadonan.

RBI Curaçao tin su propio twitter account bou di @CuracaoRbi i tambe su página riba Facebook.

E kampionato di RBI Curaçao ta ranka sali djasabra 21 oktober ku e wega di apertura na Tio Daou Ballpark pa 9:30 di mainta. CBDF ta hopi agradesido ku e konfiansa ku MCB ta pone den e fundashon i tambe ta kere den yuda promové beisbòl bou di hubentut.

 

CBDF no solamente ta dediká su mes na RBI beisbòl, pero tambe nos a jega di organisá RBI softball pa mucha muhé. Tambe CBDF a bin ta aporta na FeBeKo (CBF) ku donashon di bala. Den pasado CBDF a organisá kurso pa umpire, kurso pa coachnan (CDP) bou di supervishon di MLB, diferente klínika ku coachnan di MLB, MLB Elite Development Program, e evento mas grandi di ‘scouting’ di MLB ku Kòrsou a konosé, kual lo reinisia den luna di november, hasi donashonan di material pa beisbòl i softball na organisashon di tur nivel i tambe duna yudansa pa limpia parkenan di beisbòl di diferente organisashon rònt Kòrsou. Ademas CBDF ta instrumental pa huntu ku MLB registrá e hóbennan ku tin potensial pa firma ku ekiponan di Liga Grandi. No ta keda solamente na e parti profeshonal pero ta instrumental pa organisá ‘College Showcase’ pa krea oportunidat di beka pa un otro grupo di pelotero. Ya pa algun aña CBDF a bin ta aporta pa dos hungador lokal ku ta mas interesa di kombina un estudio ku baseball na Merka, por partisipa na e MLB College Trip. Tur atletanan hóben entre 13-18 aña por train dos biaha pa siman gratuitamente ku akademia (Dutch Caribbean Baseball Academy).

 

Por ultimo nos ta aporta huntu ku KNBSB ne ‘workouts’ nan di mayoria di nos profeshonalnan durante ‘off-season’. CBDF ta spera ku por sigui yuda ku e desaroyo positivo di beisbòl lokal. Tur e proyektonan aki ta realisabel ku e sosten di nos partnernan KNBSB, MLB , MCB, CTB i Curaçao Baseball Week.