Booshi Wever: OTMAR SU CRITICA NA AVP TA MANERA E BURICO TA YAMA E PORCO PA OREA DI PARA TAXI!!

Booshi Wever: OTMAR SU CRITICA NA AVP TA MANERA E BURICO TA YAMA E PORCO PA OREA DI PARA TAXI!!

Informacionnan confidencial cu gobierno no kier divulga, normalmente ta yega den nos “brievenbus” particular. No ta posibel pa constata ta ken a hink’e aden. Pa e motibo cu ainda no tin un ley pa proteha e “klokkenluider” ta bira imposibel pa menciona nomber di e persona cu a entrega e informacion.

Den e caso di Otmar e situacion ta diferente, pasobra e NO mester di “klokkenluider”. E mes ta esun cu tabata tin acceso na tur informacion di e gobierno durante di mas di 7 aña. Tur informacion lo ta bon warda den su file special cu lo por tin diferente topico, manera: *con pa abusa di e pueblo su inocencia, *con pa enrikese su mes y su amigonan durante su funccion como minister, *con pa vigila su coleganan di partido y finalmente *con pa evita cu nan lo por basha abou riba su propio actonan coruptivo.

Parce cu Otmar kier reemplasa su ex-lider como “de braafste jongentje in de klas” cu obviamente kier laga nos tur compronde cu e nunca a kibra un kopi ora cu ela critica Mike Eman, pa su declaracion hasi encuanto entre otro e dump na Pakietenbos. Otmar kier pa nos pueblo compronde cu e gobierno ta tuma decisionnan descabeya y ad-hoc y principalmente cu awor cu ta “5 pa 12” pa e eleccion di september. Otmar sinembargo kier pa nos pueblo lubida cu pa mas di 12 aña largo e mes tabata forma parti di e partido cu awor e ta desprecia y cu ta su mesun persona cu a apoya e boycot di e proyecto abiertamente hunto cu Andin y dos otronan riba su lista. E hunto cu su “partners in crime” a percura cu e pueblo di Parkietenbos ta sufriendo djies pa un capricho infantil y pa faborece un finanzista di AVP y POR. No lubida cu e tambe pa parti di esnan cu a perhudica e pueblo di San Nicolas, dor di a boycotea e proyecto di IMSAN pa awor bisa cu su partido lo bay all out pa duna e sosten completo na IMSAN.

Den mesun forma, e mes como miembro di oposicion a declara den pasado, cu e lo regla di inmediato e ruina di hotel Bushiri. No ta e mes kier a yega na un areglo bou man cu rumannan di su mentor Tico Croes? Hasta nos sa cu tabata tin un procedura pa basha e

edificio di Bushiri abou y esaki no bay dor pasobra esun cu a gana e bid, no kier a paga 86.000 florin bou mesa cu Otmar a pidi e contratista. No ta e mes ta e persona cu no kier a divulga e rapport cu gobierno a paga y cu a wordo ehecuta door di Price Waterhouse Coopers encuanto e polemica di all-inclusive y cu a hasta hib’e na un debate emocional cu su actual miembro di partido Bikker den parlamento, kende a acuse di “spindoctor”? No ta e mes cu a indica cu oposicion no sa kico nan ta papia ora ATA y su persona a gaba na grandi cu turismo a subi mas di un miyon persona, apesar cu a indica cu ta trata di Venezolanonan cu a bin busca dollars? No ta su persona a sigui e maneho di dividi y manipula cu e diferente asociacionnan di taxi? No ta e mesun Otmar cu a crea un departamento nobo y nombra un amigo di dje cu un salario barbaro sin cu esaki tin e experticio necesario pa dirigi un departamento asina?
Y no ta su persona cu na principio di januari 2016 a bisa texualmente: “Awe mi ta mas orguyoso cu nunca di e gobierno aki, y mas orguyoso cu nunca di e partido cu ma scohe pa inicia mi carera politico”!! Ironia den esaki ta cu den e mesun luna di januari 2016 a critica e partido abiertamente y ferozmente y hasta a bay gobernador pa entrega un carta cu 10 punto cu lo mester a wordo atendi sino elo retira como minister? Y sin ningun tipo di berguenza a keda toch mas cu 10 luna den e funccion di minister.

Mi ta completamente di acuerdo cu Otmar cu ta “5 pa 12” pa pueblo por comprende cu su ex-partido y esun cu e ta lidera awor aki tin falta di etica, moralidad, sinceridad y integridad. Ta “5 pa 12” pa pueblo por comprende cu un voto pa su persona y partido POR ta un voto pa continua un maneho devastador cu su ex-partido deliberadamente a hiba y cu su ex-lider di partido Mike Eman cu boca grandi a confirma ora ela declara di ta orguyoso di a hinca Aruba den e debacle financiero mas grandi cu nos Pais a conoce. Y kico tabata e reaccion di Otmar; ela sinta bati man y apoya Mike Eman 100%.

Otmar Oduber ta un bon ehempel di e dicho na Spaño: el burro llamándole al puerco orejón (E BURICO TA YAMA E PORCO PA OREA DI PARA TAXI). Su politica tabata mescos cu esun di AVP pa polarisa, dividi, manipula y enrikese su mes y su amigonan pa awor kier bin hunga e rol di martir y defensor di pueblo. Mester stop definitivamente cu e tipo di politica aki y e unico forma pa haci esaki ta door di inclui di antemano reglanan di bon gobernacion na unda lo mara man di e politiconan. Y UPP tin e REAL DEAL pa logra esaki pa UN MIHO MAÑAN pa un y tur.

Lider di Partido UPP
Booshi Wever

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: