Ku kambio di “kiesreglement” Kantidat di voto i no sekuensia di lista lo determiná ken ta drenta Parlamento 

Ku kambio di “kiesreglement”

Kantidat di voto i no sekuensia di lista lo determiná ken ta drenta Parlamento 

Willemstad- Parlamentario Calmes asesorá pa Sr. Gill i Sr. Kirindongo a entregá na Griffier di Parlamento un proposishon di kambio, di e lei “Kiesreglement”, ku lo bai duna pueblo mas poder riba kua kandidato ta drenta Parlamento.  

Nos elekshon ta pa skohe e kandidatonan ku ta bai representá pueblo den Parlamento. Nos “Kiesreglement” ta regla kon elekshon ta wòrdu organisá, kon asiento ta wòrdu kalkulá i tambe kua kandidato ta drenta Parlamento. Aktualmente sekuensia riba lista di partido ta determiná ken ta drenta Parlamento abase di kuantu asiento un partido saka. 

Ta konosí ku pueblo no ta kontentu ku funshonamentu di Parlamento. Resultado di un investigashon di Ofisina Sentral di Statistik di Kòrsou (CBS) ta mustra ku konfiansa di pueblo pa Iglesianan ta 42%, Parlamento 4.2% i Gobièrnu 3.8%. 

Bishitando barionan Calmes i miembronan di Trabou Pa Kòrsou (TPK) a komprondé e señal di disgustu di pueblo i mesora a  transformá esaki den un proposishon di kambio den nos “Kiesreglement”. E kambio ta enserá ku entrada di kandidatonan den Parlamento lo no ta abase di sekuensia riba lista mas. Kantidat di voto ta bai determiná ken ta bai drenta Parlamento. 

Calmes:”Kantidat di voto lo ta e yabi primordial pa drenta Parlamento”. Di e forma aki pueblo ta bai tin mas poder i kada kandidato mester tin un bon kantidat di voto su tras. Sigun Gill:”Pueblo su bos ta bai resoná bek”. Alabes e kambio aki ta evitá ku un kandidato ku tiki sosten di pueblo ta drenta Parlamento i tuma desishonnan kardinal riba pueblo. 

Na opinion di Kirindongo ku e kambio proponé aki e asuntu di “lift” drenta Parlamento tambe lo pasa pa historia. Kandidatonan tin ku bai traha duru pa risibí voto i durante gobernashon tende di pueblo pa sigui mantené e sosten di pueblo. Calmes ta konvensí ku e proposishon aki ta bai rekuperá e konfiansa i reforsá nos Parlamento.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: