Studiantenan na Utrecht a mustra un interes grandi pa dialoga cu Minister Yrausquin riba nan situacion

Studiantenan na Utrecht a mustra un interes grandi pa dialoga cu Minister Yrausquin riba nan situacion

Den Haag – E grupo significante di studiante cu ta studiando na Utrecht a mustra un interes grandi pa topa cu Minister Plenipotenciario Juan David Yrausquin. E studiantenan a bisa di ta sumamente contento pa tin e oportunidad aki pa topa cu e mandatario y ta bunita pa mira cu e minister ta pone hopi dedicacion den scucha con nan ta pasando como studiante Arubiano na Hulanda.

E studiantenan a tuma nan tempo pa hiba un dialogo constructivo cu Minister Yrausquin pa asina e mandatario por haya mas dato posibel pa haci un analisis di e situacion real cu ta biba bou di e studiantenan. Asina e por bin cu un plan di accion pa segura cu e studiantenan ta termina nan estudio cu exito. Esaki ta un punto cardinal pa minister Yrausquin den su maneho pa brinda mas sosten na nos studiantenan.

Durante di e encuentro aki mescos cu e otronan algun studiante a bai live via di Facebook pa conta riba nan experencia como studiante na Hulanda y special tocante di Utrecht, unda nan ta studia. Hopi informacion a wordo duna, tambe hopi tips na e muchanan cu ta preparando pa e aña aki bin Hulanda pa sigi un estudio avansa. Un bunita initiativa di e studiantenan mes y esaki sigur lo yuda e muchanan aun mas riba nan preparacionnan pa nan bida como studiante na Hulanda. Final e bisa cu e Plaatselijke Opvangcommissie di Utrecht tin nan mesun Facebook unda tur cu ta interesa pa bai studia na Utrecht por haya informacion y haci nan pregunta.

Na final e studiantenan a expresa nan satisfaccion riba e initiativa di e minister pa cu e anochi aki y tambe nan a gradici e mandatario pa e invitacion.

Nota pa redacion: Potret ta di Gabinete di Aruba