Meteo Kòrsou tin sistema nobo pa midi impakto di awa seru na Kòrsou
Meteo Kòrsou tin sistema nobo pa midi impakto di awa seru na Kòrsou
Willemstad – Servisio Meteorológiko Kòrsou tin un opshon pa publiko por raportá kualke insidente ku tin di haber ku tempu, na un manera digital. E opshon, ku yama Report an Impact, ta den Meteo su weather app. E ta traha riba telefonnan di e sistemanan Android i IOS. E sistema ta un bon hèrmènt pa tur hende ku ta interesá den asuntunan di tempu pa yuda Servisio Meteorológiko di Kòrsou saka mas dato pa asina yuda premirá nos tempu ainda mas mihó den futuro.
E opshon ta fasil pa usa. Djis primi riba Report an Impact den e weather app. E opshon ta saka un lista di posibel insidente di tempu, manera awaseru, welek, temblor, warwaru of otro fenómeno natural. Ora ta primi riba esun insidente ku bo ke raportá bo por yena algun informashon i asta saka portrèt di e insidente di tempu. Despues bo por manda e informashon pa Meteo. E servisio ta kolektá tur informashon pa asina por saka konklushon for di dje pa un siguiente biaha ku e sirkunstansianan ta meskos ku esun di e momento ku públiko a manda datonan aden.
Pa un isla chikitu manera Kòrsou normalmente ta difisil pa saka konklushon na kua área presis awaseru lo kai. Meteo ta mira ku tin por ehèmpel nubianan ta forma ku ta bai okashona awaseru. Na kua parti di Kòrsou e ta bai kai si ta difisil pa premirá. Pero si hopi hende den un area ta manda Report on Impact aden, Meteo si por premira un siguiente biaha, ku awa probablemente lo kai den e mesun area ku el a yega di kai, bou di e mesun sirkunstansianan di tempu.
Meteo ya kaba tin informashon ku a drenta ku e opshon di Report an Impact, durante di tèstnan hasi na Kòrsou. E servisio ta pidi tur hende pa download e app gratuito Curacao Weather i purba e opshon di Report an Impact, por ehèmpel awe nochi ora awaseru ta kai komo resultado di ola tropikal Bret.
