Muhenan ku amor pa Kòrsou ta yuda rekoudá fondo pa nos komunidat
Muhenan ku amor pa Kòrsou ta yuda rekoudá fondo pa nos komunidat
Willemstad – Durante di un anochi eksitoso, e grupo di hende muhé ku ta partisipá na un reunion di e inisiativa ˈ100 Women Who Care Curaçaoˈ , a rekoudá fondo pa Unique Learning Center Curaçao Foundation. E montante ku e organisashon aki a risibí, ta yuda pa hasi posibel ku muchanan outista por haña edukashon ku ta kuadra ku e manera ku kada un di nan por kapta i komprondé. Te ainda no tin e posibilidat aki na Kòrsou, pero ku e aña eskolar nobo, Unique Learning Center Curaçao Foundation ke kuminsá ku e promé grupo di alumno. Sin e oportunidat aki, hopi di e muchanan tin tiki oportunidat pa por haña un edukashon.
E hende muhénan di ˈ100 Women Who Care Curaçaoˈ ta hopi kontentu ku nan por yuda kristalisá un bunita inisiativa manera esun di Unique Learning Center Curaçao Foundation. Aunke ainda no a logra e montante di 100 hende muhé, ta visibel ku e kantidat di hende muhé ta krese ku kada enkuentro di ˈ100 Women Who Care Curaçaoˈ. E hende muhénan ta topa un biaha kada trimèster. Den e enkuentro di mas òf ménos un ora, ta skohe pa medio di un sistema di lòt, pa 3 proyekto ku e damanan mes a bini kuné. Representantenan di e proyektonan ta konta kiko nan proyektonan ta enserá i despues e grupo ta skohe kua di e proyektonan ta haña e fondonan di e trimèster. E fondo ta formá pa medio di e montante di 100 florin ku kada hende muhé ta pone disponibel. Esaki ta nifiká ku ora e grupo yega e montante di 100 partisipante, e donashon na e proyekto di eskoho ta bira 10.000 florin. Ku e inisiativa aki, pa aña por yuda 4 organisashon na Kòrsou pa realisá e bon kousa ku nan ta traha pe.
ˈ100 Women Who Careˈ na Kòrsou, meskos ku tantísimo inisiativa ku e mesun nòmber na diferente pais den mundu, ta boga pa duna donashonnan den nan mes komunidat, sin ku parti di e fondonan ta bai na gastunan di e inisiativa mes. Tur hende ku ta hasi esfuerso pa e inisiativa, ta hasi esaki na un manera boluntario. E grupo ta reuní den un sala di Sonesta Kura Hulanda, ku ta brinda e oportunidat aki pòrnada. Hende muhénan ku ke djòin e inisiativa aki, por hasi esaki via di e grupo riba facebook bou di e nòmber di ˈ100 Women Who Care Curaçaoˈ.
Riba pòrtret: Donna van der Dijs a risibí e montante ku e muhenan ku sintí pa Kòrsou a pone disponibel pa Unique Learning Center Curaçao Foundation. Siguiente dia ku ta topa ta dia 3 di òktober próksimo, pa 6’or di atardi na Sonesta Kura Hulanda! Djòin nos!
