Parti di e delegashon ku lo representá Boneiru a yega Cuba

Den kuadro di festival del Caribe:

Parti di e delegashon ku lo representá Boneiru a yega Cuba

Kralendijk –Djarason bintiocho di yüni e promé artistanan i e komishon di festival del Caribe di Boneiru a yega Cuba. Esaki ta den kuadro di partisipashon di Boneiru na e di trintishete edishon di festival del Caribe na Santiago de Cuba.

E delegashon ta enkabesá pa diputado di kultura, sra. Nina den Heyer: “Ta un privilegio ku Boneiru ta risibí e oportunidat úniko aki pa eksponé su kultura durante un festival ku ta bishitá pa turistanan i miembronan di prensa ku ta bini for di mas ku binti pais di Karibe i Oropa.”

Djasabra, promé di yüli demas artistanan i turista ta biaha ku buelo direkto for di Boneiru pa Santiago ku e kompania di biaha Fly Allways. E kompania di aviashon surinameño Fly Allways tin dos buelo ku e komishon a charter pa hiba un kantidat di shentiochenta persona Cuba. Entre nan alrededor di shen artista ku lo representá Boneiru riba esenarionan di e diferente plasanan i teater durante e festival.

Cuba lo por disfrutá di presentashonnan di grupo Eso, Watapana, Tuti Fruti, Intense Brassband, Maskarada, Dance Sensation i Grupo Boneriano Folklóriko. Tambe lo tin presentashon di diferente artista lokal manera rei di tumba 2017, Luigino Molina, Ganadó apsoluto di Ban Kanta nos Boneiru 2016, Beto Martis, Ganadó apsoluto di Kanto Krioyo 2017, Marian Offerman i bailadónan di músika folklor, Monique i Donny.

Dia 5 di yüli lo tin un desfile grandi ku tur partisipante. Por sigui e transmishon di e desfile aki bibu via e wèpsait di endirectocuba. E desfile ta kuminsá 5’or di atardi. Produkshon di e transmishon aki ta posibel pa medio di e kompania Lia Videos.

Sigui e página di facebook “gobièrnu ta informá” pa informashon diario di e festival di Caribe.

This site uses Akismet to reduce spam. Learn how your comment data is processed.

error: Content is protected !!
%d bloggers like this: