MEO, SBAB i SOAW na Sentro di Bario Montaña

MEO, SBAB i SOAW na Sentro di Bario Montaña

Debí nan tantu akohida, djaweps awor dia 6 yüli 2017 pa mitar di 7 anochi Akademia Popular Errol Scoop huntu ku Sentro di Bario Montaña ta organisá un siklo di 3 charla ku diferente spesialista riba nan tereno.
E promé charla ta djaweps awor 6 yüli 2017 ku e spesialistanan sr. Ronny Cornelus di MEO, sr. Sidney ‘Chi’Provence di SOAW i sr. Angelo Pichardo di SBAB. Nan lo ta presente na Sentro Bario Montaña pa duna nos komunidat informashon riba e krísis alimentisio ku nos ta señalando den nos komunidat.
Bo sa ku kuantu infrakshon MEO, SBAB i SOAW a topa durante e diferente kòntròlnan na establesimentunan? Bo ke sa kon serio e violashonnan akí ta? Ta ken ta responsabel pa kuido di salú di pueblo di Kòrsou? Djaweps 6 yüli ta e promé anochi di informashon di e siklo di informashon: “Kòrsou: un pais ku ta kome for di kònteiner, un alivio, un benefisio òf un peliger?
Sentro Bario Montaña ke alertá pueblo i mustra riba e echo ku nos ta den un krísis sin presedente. Kòntròl a laga di deseá i a krea bou di importadónan i doñonan di minimarket i supermarket un libertinahe ku infrakshonnan ku asta a alkansá un nivel kriminal. SB Montaña ke yuda trese i lanta konsiensia di pueblo pa poko poko nos lucha pa sali for di e situashon di krísis akí. Biba komo un pueblo aislá riba un isla importando 95% di nos kuminda ta otro situashon peligroso i alarmante pa e konsumidó kurasoleño. Eksesonan manera produkto bieu ku a pasa fecha i produkto dañá, ta oumentá aún mas e rísiko i insiguridat pa e konsumidó kurasoleño.
Akademia Popular Errol Scoop i Sentro Bario Montaña kumpliendo ku su tarea, funshon i meta ta invitábo pa bin skucha, hasi pregunta, papia i forma bo opinion krítiko riba e faltamentu grave ku rèspèt pa nos leinan i nos salú.
Despues di e anochi aki e siklo ta kontinuá dianan 11 i 13 di yüli 2017 di 6.30 pa 9‘or. Pa mas informashon òf pregunta por yama telefon 687- 4209 òf 529-5512.
Entrada ta grátis. Un boka bisa otro.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: