Trabounan di mantenshon di kaya ta bai kuminsá den Ansinghstraat, De Ruyterkade i Van Speyckstraat

Trabounan di mantenshon di kaya ta bai kuminsá den Ansinghstraat, De Ruyterkade i Van Speyckstraat

Willemstad – Obra Públiko di Ministerio di Tráfiko, Transporte i Planifikashon Urbano den koperashon ku e kontratista CWM ta bai hasi algun trabou di mantenshon den área di Punda. Ta trata spesífikamente di e kayanan Ansinghstraat, De Ruyterkade i Van Speyckstraat. E trabounan ta tuma lugá for di 6 di yüli te ku dia 20 di yüli próksimo.

E trabou ta enserá raspamentu di e kapa di asfalt pa despues pone esaki bek. E motibu prinsipal ta mantenshon di e kayanan menshoná ya komo nan a yega na nan tempu pa esei. Drechamentu i mantenshon di kayanan den área di nos sentro di siudat ta duna un realse na nos infrastruktura tantu pa nos komunidat komo pa e turista ku ta disfrutá di nos isla.

Pa e trabounan tuma lugá na un forma responsabel, esnan den Van Speyckstraat i De Ruyterkade ta tuma lugá den oranan trempan di djadumingu mainta. Nan lo ta di durashon kòrtiku, pues no ta nesesario pa sera e kayanan aki. E trabounan den Ansinghstraat ta poko mas intensivo loke ta pone ku pa dos dia durante e periodo menshoná ta sera e kaya aki pa tráfiko motorisá.

Pa hasi e stagnashon di tráfiko mínimo, ta tapa e borchinan di ‘verboden’ den e área i bòltu e tráfiko di moda ku e tráfiko pa bai Katedral i RK Schoolbestuur por keda flui. Pa tráfiko normal ku tin un otro destinashon, tin bòrchinan ku ta mustra outomobilistanan riba e desviashonnan. Obra Públiko ta pidi pa tene kuenta ku velosidat na e parti aki di entrada di nos sentro di siudat pa motibu di e trabounan ku ta tuma lugá.