Transmishon GoldCup

Willemstad – Ta un plaser pa anunsiá ku Gobiernu di Kòrsou a logra optené e derechonan pa “2017 Concacaf Men’s Gold Cup”. Awe nochi 7 or lo trasmiti e promé wega di Kòrsou, enfrentando Jamaika den Qualcomm Stadium na San Diego.

Kanal “Fox” a otorgá e derecho na TeleCuracao pa pasa e wega unikamente pa teritorio di Korsou. E derechonan ta konta pa e periodo di 7 di jüli te ku 27 di jüli. E akuerdo ta nifika ku por pasa e weganan na Ingles of Papiamentu ku komentàr lokal.

TeleCuracao lo pasa e weganan via di TeleCuracao, CBA, TV Direct13 i tambe Nos Pais. Gobiernu a sòru pa e kanal nan lo no tin ku paga èkstra pa e transmishòn nan aki, i por bisa ku esaki a sosode den kuadro di esfuersonan pa duna aporte na nos futbolistanan i nan fanatikada, pero tambe pa alsa nos orguyo i identidat nashonal. Nada ta úni un pais màs ku deporte i den e gobiernu aki su programa di gobernashon e parti di Nation Building ta sentràl.

Minister di VVRP ku ta responsabel pa telekomunikashon, Sra. Zita Jesus-Leito a hasi su máksimo esfuerso en koperashon ku TeleCuracao e siman aki pa logra optené e derechonan di Fox, i ta yama danki na tur su kolega nan ku a sostené e inisiativa aki, espesialmente minister-presidente Sr. Eugene Rhuggenaath i minister id finansia Sr Kenneth Gijsbertha.