KÒRSOU TA MEHORÁ SU MANEHO PA SEKTOR DI TRANSNATIONAL EDUCATION (TNE)

KÒRSOU TA MEHORÁ SU MANEHO PA SEKTOR DI TRANSNATIONAL EDUCATION (TNE)

WILLEMSTAD- Ministerio di Desaroyo Ekonómiko (MEO) ta trahando deligentemente pa sigui mehorá su maneho pa loke ta trata e sektor di TransNational Education (TNE).
E maneho di TNE a keda aprobá na febrüari 2015. Den su afán pa yega na un implementashon di esaki, Ministerio di Desaroyo Ekonómiko (MEO) a organisá un diálogo demokrátiko pa kompilá pasonan importante ku lo por aportá na kristalisá MEO su vishon pa ku TNE. E diálogo demokrátiko aki a tuma lugá bou di guia di e tim lokal di “United Nations Development Programme” (UNDP).

Durante e diálogo aki, djasabra último dia 8 di Yüli, por a konta ku un kantidat di partisipante variá, representando diferente grupo di interes di e sektor di TNE i tambe kolaboradornan ku ta traha riba e aspekto di maneho den e diferente ministerionan.
E diálogo demokrátiko ta un método desaroyá pa United Nations Development Programme (UNDP) ku por wòrdu uzá pa logra duna un aserkamentu na puntonan di prioridat entre gruponan ku tin interesnan diferente. MEO a opta pa uza e instrumento aki debí ku den pasado (diálogo demokrátiko pa empresanan chikitu i mediano) i resientemente diálogonan demokrátiko pa e sektor di E-commerce a duna bon resultado i tambe hopi importante ta ku MEO ta haña feedback dirèkt di e aktornan prinsipal i asina por delineá pasonan konkreto pa un maneho ku ta keda kargá dor di e gruponan di interes.
Esaki ta e tres akshonnan prinsipal ku a bini dilanti durante e diálogo demokrátiko pa loke ta trata e sektor di TNE:
1. Krea un struktura di kordinashon den gobièrnu (basá riba un konstelashon di sektor públiko i privá) ku ta mas inklusivo, efektivo i tin e outoridat pa monitoriá desaroyonan den e sektornan eksistente di TNE.
2. Optimalisá servisionan di imigrashon pa asina hasi e proseso di otorgá pèrmit mas efisiente (mas simpel i lihé). P.e. dor di duna un pèrmit pa e durashon di e estudio, un visa pa studiante p.e. manera FI /I20 visa manera nan ta uza den eksterior (Merka).
3. Mehorá e kolaborashon entre e universidatnan i institutonan eksisente promé ku atrae otro.

Tambe a sondea kiko e partisipantenan mes lo por hasi pa aportá na realisashon di implementashon di e maneho di TNE. For di e diálogo demokrátiko a sali na kla ku e partisipantenan lo ke:
• Partisipá den un konseho òf plataforma pa asina sostené i siña di otro i traha na un interes komun.
• Partisipá den un konseho òf plataforma ku lo sigui revisá e meta i desaroyonan i konsekuensianan pa e sektor di TNE.
• Merkadea Kòrsou no solamente komo sentro di edukashon pero komo un ‘hub’ di edukashon i tambe merkadea pais Kòrsou mes tambe.

E diálogo demokrátiko a kana di forma masha ameno i por bisa ku tabatin un bon sinergía entre e partisipantenan i di parti di MEO tabatin kolaboradornan presente ku a traha riba e maneho di TNE, ku a duna asistensha na preguntanan adishonal ku a bini dilanti. Aparte di e puntonan ariba menshoná a sali tambe otro puntonan di akshon for di e diálogo demokrátiko ku tambe lo risibi e atenshon nesesario. Ku e resultadonan aki MEO ta kla pa sigui ku e siguiente pasonan pa implementashon di e maneho i vishon pa e sektor di TNE.
Siguientemente lo presenta e resultadonan di e diálogo demoktrátiko aki na Minister di Desaroyo Ekonómiko, sr. Steven Martina.
Sra. Zulaika Mook, direktor di e sektor di Desaroyo Ekonómiko i Inovashon, kier gradisí e tim lokal di United Nations Development Program (UNDP) pa a kordiná i fasilitá e diálogo demoktrátiko aki.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: