KOMUNIKADO DI KUERPO POLISIAL KÒRSOU Ladronisia ku violensia i detenshon.

KOMUNIKADO DI KUERPO POLISIAL KÒRSOU
244 / 2017
13 yüli 2017
Ladronisia ku violensia i detenshon.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djárason 12 di yüli 2017, alrededor di 22.00 or, Sentral di Polis a risibí notifikashon di un kaso di ladronisia ku violensia ku a tuma lugá na un establesimentu riba Kaminda Brievengat. For di un investigashon preliminar ku polis a realisá na e sitio a resultá ku dos(2) hòmber, unu ku arma di kandela a drenta e establesimentu i bou di menasa a bai ku benta di dia, plaka kèsh di algun kliente i telefòn selular. Despues di nan akto nan a hui bai for di e sitio den un outo koló kòrá. Diferente unidat polisial ku a dirigí nan mes pa e sitio a kuminsá ku búskeda den e área pa asina por detené e sospechosonan. Na altura di un vèlt di bala den Kaya Koko Le Pol polis a haña e vehíkulo kòrá den kua e sospechosonan a hui despues di nan akto di ladronisia ku violensia. Riba e vèlt tabatin un grupo di hòmber di kua unu tabata kuadra ku deskripshon di un di hòmbernan ku un ratu promé a kometé e ladronisia ku violensia ariba menshoná. Durante di kòntròl riba e hòmber aki polis a haña un kantidat di plaka kèsh den un tas ku e tabatin den su poder. Durante kòntròl di un otro hòmber riba e vèlt, polis a hañ’é ku yabi di un outo marka Mitsubishi. E hòmber a deklará ku e yabi ta di e outo kolo kòrá ku polis a haña na e vèlt. Polis a detené e dos hòmber nan aki:  F.H.B. di 28 aña di edat;  J.A.B. di 20 aña di edat, ámbos nasé na Kòrsou, komo sospechoso di e ladronisia ku violensia ariba menshoná. Kontinuando ku e investigashon polis a hasi entrada hudisial na kas di un di sospechosonan den Kaya Koko Le Pol i pafó den un frishidèr a haña paña ku e sospechoso tabatin bistí na momentu ku e la kometé e akto. A konfiská plaka kèsh, paña i e vehíkulo koló kòrá pa mas investigashon. Tambe a presentá ámbos sospechoso dilanti un Fiskal Ouksiliar ku a ordená nan enkarselamentu pendiente pa mas investigashon.
Polis ta gradisí komunidat pa nan aporte i kooperashon duná pa asina solushoná diferente kaso. Nos ta sigui konta ku bosnan kooperashon. Huntu nos ta logra un mihó Kòrsou.