‘SALUD PUBLICO NA ARUBA TAMBE MESTER WORDE HIBA PA E ‘PROXIMO NIVEL’ ! ‘

BENNY NISBET(PPA):
‘SALUD PUBLICO NA ARUBA TAMBE MESTER WORDE HIBA PA E ‘PROXIMO NIVEL’ ! ‘
Atencion di specialista dentro di termino, derecho di patient riba un ‘second opinion’, Golden Hour pa Tur y introduccion di un Ombudsman pa asunto di salud publico!!’
Ta bisto cu pueblo ta basta frustra pa cu funcionamento di nos salud publico en general ! PPA tin intencion di dedica atencion na e tereno importante aki. Na prome lugar dentro di e renovacion di nos presupuesto general PPA ta mira necesidad pa indica 3 of 4 tereno unda lo no tin bahamento di e suma destina pa e tarea specifico y un di nan segun vision di PPA lo ta ‘salud publico’.
ATENCION DI DOKTER Y SPECIALISTA !:
Un frustracion di pueblo ta cu ta warda di mas pa hanja nos ‘huisarts’ y specialista pa mira. Especialmente specialista !! Nos ta consciente cu cierto patient ta warda 5 pa 6 luna cual ta inacceptable dentro di un salud publico responsabel. PPA ta consciente tambe cu varios patient a hanja nan mes ta biaha pa exterior pasobra nan a hanjele irresponsabel pa warda 5/6 luna pa hanja atencion di un specialista.
PPA ta di opinion cu lo mester worde fiha den nos reglanan un termino dentro di cual un patient mester por hanja su ‘huisarts/dokter’ y specialista pa mira !! Ora cu e termino aki surpasa e termino stipula den nos leynan/reglanan e patient tin di entrega keho na AZV y otro instancia cu lo por conduci cu riba e tereno specifico aki AZV/gobierno ta laga mas specialista bin nos pais. E necesidad y atencion pa nos patient mester ta central.
DERECHO RIBA UN SEGUNDO OPINION!:
Pueblo di Aruba mester worde splica cu como patient nan tin derecho riba un ‘second opinion’ ! No kabe duda cu e accento cu PPA a pone riba esaki durante e debate di millennials a capta atencion di esnan presente y sigur di pueblo. Un patient tin derecho riba un ‘second opinion’ y esaki mester worde respeta pa tur ‘specialista’. Gobierno mester produci programanan dedica na un systema di salud publico sano den cual gobierno mester accenta e ‘derechonan di un patient’ y cu nan no mester tin miedo pa para pa nan derecho. Un second opinion ta derecho di un patient y si E ta desea di hasi uso di esaki su opinion mester worde respeta y e specialista lo mester respeta esaki.
GOLDEN HOUR ??
Ta conoci cu den casonan grave…un patient mester di atencion medico dentro di un asina jama ‘golden hour’. Pa hopi anja PPA ta mustra cu patientnan di p’ariba di brug den hopi caso no ta ricibi e atencion aki dentro di e ‘golden hour’. Y aki nos ta referi principalmente na atencion medico door di Hospital esta dokter y specialista. Cu personal di ambulance ta cuminsa atenden cu un patient ta positivo pero den caso di gravedad NO suficiente. E hecho cu e clinica na San Nicolas NO a worde permiti pa bira un Hospital normal ta di lamenta !! Ora cu tin accidente grave of un ciudadano a bira hopi hopi malo parti pariba di nos Isla ta keda como pregunta ….si realmente nan ta ricibi atencion medico dentro di e ‘golden hour’ aki ?? Nos di PPA ta duda esaki seriamente y e maneho di un gobierno nobo di PPA lo mester dedica atencion serio na e pregunta aki !!
UN ‘OMBUDSMAN’ PA TRATA KEHO Y PREUCUPACION RIBA TERENO DI SALUD PUBLICO !!
E instancia aki di un ‘ombudsman pa salud publico’ por hasi su analisis rond di e keho y preucupacion manda pa pueblo cu e meta di manda carta pa e instancia relaciona cu esaki cu posibel preucupacionan ……copia di e carta aki lo por worde manda tambe pa parlamento di Aruba a menos cierto momento tin ‘secretia di patient’ den e problematica encuestion.
Entodo caso ‘salud publico’ ta un tereno unda tin hopi trabao pa hasi pa asina por hiba nos ‘salud publico’ tambe pa e proximo nivel aki na Aruba. Den un proximo articulo PPA lo bai mas riba e tereno specifico aki unda e ‘ser humano/patient mester ta central’ !!

Aruba, 16 di juli 2017 Lider Politico di PPA
BENNY NISBET