Rekonosé nos hendenan awó, awó!

Rekonosé nos hendenan awó, awó!

Prinsipalmente pa polítiko, gobernante, komersiante i miembronan di e komunidat aki komprondé for once and for all, e siguiente opservashonnan skèrpi. Tin personahenan klave den e komunidat di Kòrsou ku mester keda rekonosé of mihó bisá meresé un tremendo homenage na okashon di “Relevo di Waaigat 2017”, dia 17 di sèptèmber binidero. Una bes ku “Relevo di Waaigat 2017” ta parse di bira un evento espektakular, grandi i bon bishitá, t’esaki ta e mihó momento di un akshon pa yama danki i demostrá apresio. Pa kuminsá mi ta referí aki otro biaha na eks bankero di Banco di Caribe señor Eduardo “Eddie” de Kort, kende di un forma inkansabel (17 aña largu) a insistí ku su esfuersonan pa konsientisá pueblo di Kòrsou i siña nos tur ku mester atendé ku e “Binnenwater” ku yama Waaigat di un forma muchu mas responsabel. Señor Eddie de Kort a demostrá klaramente ku Waaigat en realidat ta nada otro sino un prenda presioso ku Dios a bendishoná Kòrsou kuné, kua “Binnenwater” pa kolmo ta situá presis den sentro di Punda. Siendo ku Waaigat pa kustumber den nos pasado tabata konstantemente shushi, komo ku aki nos hendenan tabata benta shushi i laga e awa di riolering i kloakanan pasa bai basha eiden, señor Eddie de Kort a lanta direpente un dia lansa e idea ku preferiblemente mester kambia Waaigat pa un yachthaven. Despues di sali padilanti i tuma inisiativa pa kombersá ku gobernantenan riba su ideanan, e mes a introdusí un fundashon pa drecha Waaigat ku el a yama Fundashon Desaroyo di Waaigat. Señor de Kort mesora a pone fondo disponibel, anto a aserká kolega bankero Lionel “Paps” Capriles di MCB di felis memoria i otronan, ku generosamente a koperá, kreando un fondo ku a sirbi pa por a koba i limpia Waaigat te den fondo. Komo tal fo’i Waaigat a saka karganan grandi di shushedat i porkeria pone riba lancha, bai benta den laman grandi, anto asina ei trese Waaigat bèk den un estado di limpiesa i higiena aseptabel, ku e awa aki sigur no tabata konosé anteriormente. Ta p’esei Waaigat masha tempu no ta plama oló stinki mas! Pa e brùg di Skalo ku despues di tantu dékada tras di lomba, tabata mal dañá i ku no tabata sirbi mas, Eddie de Kort a buska un remplaso na Ulanda. Señor de Kort a laga diseñá algun pintura kon lo e ke mira Waaigat. Por papia aki di diseñonan inkreiblemente bunita i atraktivo ku no opstante ku esakinan no a konkretisá ainda lo sigui ta guia pa generashonnan siguiente, demostrando klaramente ku mester atendé Waaigat ku un ambishon haltu.
Mas figuranan ku Kòrsou mester rekonosé na un okashon tan spesial asina ki ta por ehèmpel Anthony Minguel i Wendell Prince, kendenan ta e pioneronan pa atletismo na Kòrsou. Si awe atletismo a bin ta gana na interes i aseptashon masal serka e hubentut di Kòrsou ta danki na esnan di promé ora, kendenan a hinka tur tempu, hasiendo enorme sakrifisio pa atletismo keda rekonosé i aseptá. Atletismo mas i mas ta birando un atrakshon pa nos hendenan ku no tin asina tantu rekurso. E generashonnan aktual mester siña konosé i rekonosé esfuersonan inkansabel di e konosido Anthony Mingel pa atletismo, kiko un figura asina a nifiká realmente pa desaroyo di atletismo na nos isla. Anthony Mingel su insistensia pa atletismo, e manera ku el a duna ‘boost’ na “Relevo di Waaigat”. Señor Anthony Minguel aktualmente ta biba na Ulanda, pero semper tabata un di e trahadónan duru pa e atletismo di Kòrsou. Anto tambe Wendell Prince, di orígen mener di skol, kende tabata un gran atleta i despues a bira un di e dirigentenan di klup di atletismo, entrenadó inisial di Churandy Martina i otronan. “Relevo di Waaigat 2017” ta na kaminda, pero tin un parti di e historia di atletismo ku mester bira muchu mas konosí ainda. Ta nifiká ku ta na Curacaose Atletiek Bond pa profundisá den e materia tan importante aki. Konosé e historia di atletismo ta un punto di prioridat ku ta rekerí buskamentu di e rekursonan finansiero nesesario pa por investigá i sigurá e klaridat nesesario. Enfin, “Relevo di Waaigat 2017” mester bira un aktividat ku Kòrsou kompletu ta orguyoso di dje i ta duna asistensia masal.

Erwin Raphaëla

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: