Ser bo mes? Esei por na Korsou?

Ser bo mes? Esei por na Korsou?

E tumulto ku a surgi despues di e proposishon pa matrimonio entre pareha mes un sèkso, ta duna motibu pa bastante diskushon, tin bes ku hopi ekspreshon emoshonal e.o. riba medionan sosial. Ta parse ku na Kòrsou tur hende tin opinion tokante matrimonio entre pareha mes un sekso. Sea esaki ta bin di kreensia of siensia. Lokual ta remarkabel ta ku tin hopi suposishon. I esaki ta trese e konsekuensianan indeseá menshoná aki bou:
• Mandatarionan ta papia di tene un referèndum tokante matrimonio entre pareha mes un sekso. Esaki ta parse logíko pero e no ta. Ta berdat ku un referèndum ta un bon manera pa di forma demokrátiko puntra pueblo su opinion, pero den e kaso aki e ta kompletamente inadekuá. Pasó un gran parti di hende na Kòrsou no tin sufisiente konosementu tokante e tema homoseksualidat na Kòrsou. Nan ta biba ainda ku hopi asunshon kiboká ora ta trata e grupo chikí LGBT. Kon hustu lo ta awó pa pidi e grupo aki pa disidí riba destino di un grupo mucha mas chikí. No por. E referèndum ta kondená di antemano pa duna un resultado inbalansá. Banda di esei e referèndum aki lo ta alabes inkonfiabel pasó e lo ta basá riba un tópiko deskonosí i informashon eróneo.

• Tin muchu tiki informashon bon i transparente tokante homoseksualidat. Kontrariamente ku Kòrsou, na otro luganan na mundu hendenan tin informashon mucho mihó, aksesibel i di un forma mas habrí. Pa e motibu ei nan ta mas tolerante ora ta trata orientashon seksual, e.o. homoseksualidat. Nan ta basa nan opinion riba informashon general i siensia. Nos sa awe ku 1 di kada 10 persona ta homoseksual. Na Kòrsou esaki lo ta mas of menos 15.000 hende. Kuantu di e hendenan aki na nos pais no ta tribi di sali defende na orientashon seksual – i nan derechinan – solamente pa motibu di e ignoransia, i asunshonnan kiboká, i pa motibu ei miedu? Esaki no por ta asina den un pais moderno manera Kòrsou.

• Derechinan di e komunidat-LGBT ta derechinan sivil. I esaki nan ta riska di wòrdu violá. Na hopi pais moderno e derechinan di e grupo LGBT ya pa hopi tempu kaba ta igual ku esnan di hende heteroseksual i personanan soltero. Formal i legalmente. Den mundu, i den Reino Ulandes, parehanan di mes un sekso tin derechinan igual ora ta trata:

 matrimonio entre pareha di mes un sekso i/òf e asina yamá “geregistreerd partnerschap”
 adopshon
 posibilidat pa por kompartí penshun, seguro, derechinan parental, herensia i hopi mas

Si Kòrsou ke partisipá riba mapa mundial komo un pais moderno i open minded – i esaki ta parse nos nesesario anno 2017, ku un populashon diversifiká, meskos ta konta pa turistanan nan – gobièrnu lo mester karga ku su responsabilidat.

Nos, Kòrsou Solidario I Duradero (KSD), ta di opinion ku gobièrnu mester traha un proposishon di lei, pa na kontinuashon esaki wordu apliká, den kual ta garantisá derechinan di e grupo LGBT aki na Kòrsou.

Pa e grupo aki por biba sin miedu, sin asunshon, sin perhuisio, pero gewon pa nan haña e derechi di por ta nan mes meskos ku den tur pais moderno.