KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

Akontesimentunan di djadumingu 23 di yüli 2017

Akontesimentunan di djadumingu 23 di yüli 2017

Den oranan di marduga tabata tin un aksidente riba Winston Churchillweg na momentu ku un outomobilista a pèrdè kontròl riba su stür i a resultá ku su vehikulo den muraya di un kas. E shofer mester a risibí asistensia mediko. A konsekuensia di e choke, tabata tin pipanan di awa ku tambe a keda destruí. 

Tabata tin un kaso di tiramentu tambe den oranan di marduga, na altura di La Tasca situá den Frederickstraat. Agentenan polisial a hasi detenshon di dos persona ku tabata envolví den e kaso aki. Ambos persona ta permanesé ilegal na Kòrsou. 

Den un restaurant situá riba Weg naar Westpunt tabata tin un kaso di agreshon kaminda un hòmber a bira agresivo i tabata tin intenshon di kap tur persona ku tabata na e sitio. Motibu di su agreshon tabata ku a nenga e hòmber di habri un kuenta p’e den e establisimentu. Agentenan polisial a detené e hòmber.  

Den Arubastraat tabata tin un aksidente na momentu ku un motosiklista a pèrdè kontròl riba su vehikulo i a bai resultá den un palu di lus. E motorsaikel a resultá mas o menos 6 meter mas leu for di e sitio di e aksidente. Servisio di Ambulans a akudí na e sitio pa transportá e motosiklista pa poli. 

Un grupo di studiante a hera di bira viktima riba Caracasbaaiweg na momentu ku nan a keda persiguí pa un otro vehikulo for di Caracasbaai direkshon pa Jan Sofat. E vehikulo ku tabata persiguí nan tabata pita i dal nan ku lus. Na momentu ku nan a hala para kantu di kaminda nan a keda aserká pa un hòmber deskonosí tur na pretu ku a baha for di e otro vehikulo. E studiantenan a reakshoná rapido i a kore bai for di e sitio. Agentenan polisial tin atenshon pa e kaso.

Na Ronde Klip tabata tin otro intento di atrako na momentu ku un hòmber a lòs algun shutter di un bentana di baño i a drenta e kas. Den e kas el a enkontrá un dama ku el a pusha kita for di su kaminda. E hòmber a trata di hui sali bèk for di e mesun bentana pero el a kibra algun shutter i el a kòrta su kurpa den su huida.

Detenido Edwin Valentina a keda transladá for di Hulanda bèk pa Kòrsou. E tabata detené na Kòrsou i pa motibu di peliger pa huida a transladá e detenido pa Hulanda. Awe el a regresá Kòrsou pa sigui sinta su kastigu.

Agentenan polisial a hasi detenshon di un hòmber ku tabata tin varios karchi di bankomatiko ku tabata falsu, den su poder. E kaso aki ta den investigashon komo ku ta trata di mesun tipo di karchinan pa kual a hasi otro detenshonnan anteriormente. 

Agentenan polisial mester a akudí rapido dilanti di Mc Donald’s riba Dr. Maalweg pa un kaso di agreshon. Aki dos hòmber ku tabata den un vehikulo a para un otro vehikulo i nan a kuminsá agredí e shofer. Dos dama ku tabata den e vehikulo a baha i nan tambe a keda agredí. Agentenan polisial a hasi detenshon di un hòmber.

Leave a Reply

This site uses Akismet to reduce spam. Learn how your comment data is processed.