Partido MFK, sin un kabesante i denominá komo kriminal.

Partido MFK, sin un kabesante i denominá komo kriminal.

Den un publikashon devastador ku a sali den e korant Antilliaans Dagblad di dia 24 di yüli na página 8, skibí i firmá pa George Lichtveld tin un artíkulo ku ta yama atenshon pa e sirkunstansia di partido Movementu Futuro Kòrsou aktualmente, despues di e último akontesimentunan, tur relashoná ku hustisia. Pa kuminsá George Lichtveld ta konsentrá mesora riba e sentensia di 21 di yüli último, kaminda segun e outor aki, lider di MFK señor Gerrit Schotte atraves di kaso tratá den apelashon a bolbe keda kondená na kastigu di prizon pa e periodo di 3 aña, mas 5 aña ku lo e no por hasi uzo di su derecho di voto. Esaki ke men ku Gerrit Schotte lo no por para riba lista di ningun partido polítiko 5 aña largu, anto esaki den práktika ta nifiká simplemente ku pa 2 elekshon e ta ekskluí di e derechi ei. Masha remarkabel ta e opservashon di George Lichtveld, kaminda esaki a deklará di ta aploudí e hecho ku e abogadonan di Schotte mesora a pasa over pa bai den apelashon tambe den Cassatie, anto ku e desishon aki lo sòru pa tur nan derechi keda agotá, es desir ku nan a kana tur kaminda di prosedimentu posibel. Komo tal e resultado final lo keda marká pa historia George Lichtveld a konkluí mas aleu. Den e mesun artíkulo aki, produsí pa George Lichtveld, e ta yama atenshon pa un otro akontesimentu importante, esta e hecho ku e komersiante Francesco Corallo a disidí pa e na su turno no resistí kontra di su entrega na hustisia i of outoridatnan italiano. George Lichtveld a bai asina leu pa interpretá e desishon di Francesco Corallo pa duna preferensia na bai será na Italia i no na Sint Maarten, komo e eskoho pa no pasa angustia den e sèlnan di polis na Sint Maarten. E punto krusial ku ta kapta mayor atenshon den George Lichtveld su artíkulo ta kaminda el a deskribí Gerrit Schotte i Francesco Corallo komo e doñonan legítimo i indiskutí di Movementu Futuro Kòrsou (MFK), kendenan ta esnan ku a lanta e agrupashon polítiko aki, pero awor debí na tur loke ta pasando lo ta for di funshon, komo tal lo no por manehá MFK por lo pronto. Mas aleu Lichtveld ta sita un teksto na ingles ku a sirbi pa motivá su konklushon ya ku esaki lo ta e akuerdonan ku a sera promé ku a lanta MFK i ku e poder den e partido aki en realidat ta repartí entre e dos figuranan ariba menshoná, esta Gerrit Schotte i Francesco Corallo. George Lichtveld ademas, hasiendo uzo di e mesun teksto ariba menshoná, no ta basilá ningun momento so pa yama MFK puramente un organisashon kriminal, loke sigur ta mishi dirèkt ku e imágen di tur esnan ku ta afiliá na MFK. Mester konkluí ku e artíkulo aki ta unu hopi skèrpi ku akusashonnan duru i fuerte, anto ku ekspreshonnan manera ‘maffiabaas’, baho mundu italiano etcetera ku mesora ta trèk MFK bai kuné hinka den un lus sumamente negativo. George Lichtveld klaramente ta kuestioná eksistensia di MFK awor ku Schotte i Francesco ta asina okupá ku hustisia ku tur nan tempu mester bai pa bringa nan kasonan ku hustisia. Ku sierto pasashinan di e artíkulo den man mester konkluí ku George Lichtveld a fulminá dirèkt kontra parlamentarionan di MFK, refiriendo na aspektonan manera rèspèt pa nan mes. Pió ainda ta kaminda señor Lichtveld abiertamente ta puntra kon un partido polítiko asina ainda por ta eksistí na Kòrsou awor ku esaki a pèrdè su meta prinsipal di eksistensia, esta sali na vanguardia di e interes di esnan ku a lant’é. Di nos parti e opservashonnan skèrpi i fuerte di e suidadano George Lichtveld a kapta nos atenshon prinsipalmente pa e hecho ku ta trata aki di atakenan dirigí riba e funshonamentu di nos demokrasia. Komunidat di Kòrsou por sigui konsiderá normal i komo di aseptá loke ta bini padilanti den un artíkulo asina ki? Na unda tur e simpatisadónan di MFK i miembronan fiel di e partido aki ta awor ku públikamente ta hasi menshon ku nan ta parti di un organisashon kriminal i ku e partido kompletu ta keda asosiá ku baho mundu.

Erwin Raphaëla

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: