Publikashon riba Facebook di Cicely van der Dijs i Gerrit Schotte 

Apesar di tin tur prueba, rapòrtnan di profeshonalnan akreditá, profesor di un Universidat renombrá na Hulanda i di un anotator di Hoge Raad, djabièrnè ku a pasa 3 hues a sentensia Gerrit ku mi.

3 Hues a bolbe marka futuro di nos yunan, di Gerrit ku mi i tambe di hinter nos pais. No solamente 3 hues, apesar di tur prueba trese dilanti di nos banda, ta dispuesto di laga 2 yu chikí pa por lo ménos 9 luna sin nan mama i nan tata, pero tambe nan a demostrá ku ta nan ta dirigí rumbo di nos pais. Bo bos i bo voto no ta konta!

Un doló i desapunto grandi pa nos ku a pensa ku tin algun hues realmente imparsial i ophetivo den nos pais ainda.

Hopi naief i demasiado optimista di nos parti di a pensa ku despues di a lastra nos pa 4 aña, despues ku a bira opvio ku Hof  ta protehé OM, despues di ta un di e tiki polítikonan ku ta señalá i bosifera e maneho kontra pueblo di Kòrsou dor di Hulanda, lo tin huesnan realmente hustu, ophetivo i ku tin e kurashi di tuma e desishon hustu i korekto den nos kaso ku ta Vrijspraak.

E último 4 añanan aki Gerrit ku mi a i ainda ta pasa den hopi vèrdrit, angustia, hansha, insertidumbre, humiashon, desapunto, atake riba nos persona i tambe riba nos yunan. Loke ta tene nos riba nos pianan na promé lugá ta Papa Dios, na di dos lugá nos yunan, na di tres lugá e hecho ku nos ta inosente i nos konsenshi ta limpi. 

Tristu ta pa mira polítikonan kobarde sin eskrupulo, ku en bes nan habri nan boka, ta keda ketu djis pa eliminá un kontrinkante fuerte polítiko, sin importá ku ta kibra un famia i lubidando ku un dia por toka nan mes. Nan tur sa kon finansiamentu di partidonan a bai tur tempu i tur a risibí kantidatnan grandi di sèn na un manera òf otro. Hopi di nan sí berdaderamente a duna nan finansiadó, familiar i asta kasa puesto, kontrato, opdracht òf kualkier benefisio polítiko. Djis kòrda ku e mundu aki ta rondó i ku verediktonan ta krea presedente ku ta konta pa un i tur.

Pero mi no por spera nada otro di polítikonan mediokre ku ta sirbi interes aheno en bes di esun di Kòrsou.

Na e poko nan ku si a sali duna nan opinion, danki, boso ta e muestra ku boso realmente stima boso pais.

Na e periodistanan ku ta yama nan mes periodista pero en realidat ta marionèt ku ta biba di fabor, tristu hopi tristu kon boso ta fomentá odio, renkor, opinion partidario, divishon i engaño bou di un grupo di pueblo. Tristu ku boso ta promové dekadensia bou di un grupo ku ta pensa ku ta bon gosa di otro su doló. Shame on you!

Hopi ta esnan ku ta gosa di nos doló i ku ta aploudí inhustisia. Inhustisia no solamente ta wòrdu reflehá den e kadena hudisial pero por reflehá su mes e.o. den e derechi riba un kas ku bo no ta haña, riba kuido médiko ku bo no ta risibí, riba oportunidat ku bo no ta haña den bo pais, den diskriminashon a base di bo kredo, kolo òf rasa. Inhustisia por bati na kada un di nos su porta. Mi ta spera di kurason ku nunka inhustisia ni doló bati na porta di ningun hende en espesial no na e personanan  ku ta gosando di esun di nos. 

Na e periodistanan ku si sa di hasi nan trabou na un forma obhetivo i asina ta informa nos komunidat responsabelmente, pabien. Keep it up!

Na tur esnan ku a tuma nan tempu pa manda un mensahe pa nos òf yama nos pa duna nos nan sosten, masha masha danki. Ta boso orashon i palabranan di sosten ta duna nos aun mas forsa pa sigui i nos, di kurason, ta apresiá masha hopi mes. Boso mester lucha, no tene miedo, e lucha aki no ta unu pa Gerrit Schotte, e ta unu pa nos pais.

Pa mas duru ku e veredikto tabata djabièrnè, nos ta drumi ku nos konsenshi limpi i ta kana ku nos kara na laira. Nos kurason ta limpi i hustu. Mi ta sigui lucha pa asina nos yunan no keda marka dor di inhustisia.

Nos ta sigui lucha ku e konvikshon ku hustisia lo prevalesé!

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: