Kandela na ”Scrap yard” kousando hopi molèster di huma 

Kandela na ”Scrap yard” kousando hopi molèster di huma   

Willemstad – Un kandela grandi na un “scrap yard” den área di Sabana Hundu a sòru  pa hopi molèster den área di Muizenberg. Brantwer a risibí melding alrededor di 12:10 di mardugá i a sali mesora direkshon pa e sitio. Na yegada Brantwer a kuminsá ku trabounan di paga kandela pero despues di algun ratu e kandela a desaroyá di tal manera ku esaki a bira peligroso pa kombatí despues di algun eksploshon fuerte. Na e momentu ei personal di Brantwer a hala atras i a kuminsá sòru pa e kandela no ekspandé en espera di ekipo mas pisá pa kombatí e kandela mas efektivo. Aktualmente na e sitio tin un “escavator” plamando e bolanan di sushi ku ta na kandela pa por paga esaki mas rápido. Den e fase aki barionan pa bou di e kandela ta i lo eksperenshá hopi molèster di huma, stòf i partíkulanan ku ta bula bai direkshon di bientu. Materialnan ku tabata kima ta lokual e “scrap yard” tabata kolektá kual ta entre otro: hopi karton, glas, tire, materialnan di plèstik i zeta di kushiná.

Un apelashon ta bai na habitantenan di entre otro Sabana Hundu, Muizenberg bieu i nobo i Suffisant pa tene bentananan i portanan di kas será. Personanan ku ta eksperensiá molèster, personanan ku ta sufri di Asma òf malesanan respiratorio ta ser konsehá pa bandoná e área i si tin posibilidat pa keda mientrastantu na otro sitio. Habitantenan di barionan den serkania mester tene kuenta ku molèster di holó di huma por permanesé algun dia.

Riba potrètnan por mira algun parti di e “scrap yard” ku a kima i momentu ku Brantwer ta preparando pa drenta pa kombatí e kandela.