Mas di 50 skol básiko ta partisipá awe na e di seis edishon di Koningsspelen

Mas di 50 skol básiko ta partisipá awe na e di seis edishon di Koningsspelen 

Willemstad, E dia tan spera pa tur nos muchanan di skol básiko a yega. Awe mas di djesshete mil mucha rònt Kòrsou lo bula, baila i hasi deporte despues di disfrutá di un desayuno delisioso. Ku e Weganan di Rei organisadónan kièr demonstrá ku disfrutá huntu di un desayuno salu i move aktivamente ta importante pa kresementu di e mucha i por ta na mes momento sumamente agradabel tambe.

Koningsspelen,ta un inisiativa di e komishon Nashonal di Inougurashon i koronashon di Rei Willem Alexander ku a inisia na aña 2013. For di e aña ei a sigui organisá tradishonalmente e Weganan di Rei riba e último djabièrnè promé ku aniversario di Rei Willem Alexander. E dia festivo i deportivo ta wòrdu organisá na tur parti di Reino Hulandes, ku partisipashon di mas di un mion alumno di skolnan básiko.

E weganan di Rei ta enserá un dia kaminda moveshon ta sumamente importante, kombiná ku un desayuno salu. Meta ta pa stimulá un desayuno balansa bou di muchanan di skol. Ademas e dia ta pa konsientisá tur mucha di skol básiko i nan mayornan di e importansia pa kome salú i move mas tantu ku ta posibel.

Meskos ku tur aña tur mucha ta risibí aparte di un desayuno sukulento, algun regalito deportivo danki na spònsernan fiel ku ta duna un man pa logra esaki. I e aña aki e organisashon a bolbe konta ku kompanianan prestigio ku mester wordu menshona manera Reda Sosial, Refineria Isla, Curaçaose Wegenbouw Maatschappij, Banko Sentral, Vertegenwoordiging van Nederland, Curoil, Curaçao Ports Authority, Refineria di Korsou, Nos Pais Television, Kooyman i Korpodeko. Sin nan yudansa balioso lo no por a organisá e dia spesial aki.

Kada skol ta liber pa duna nan mes kontenido na e dia deportivo Oraño aki. E apertura ofisial na enkargo di Gobernador di Kòrsou, Lucille George Wout, lo tuma lugá pa promé biaha na dos skol diferente. Primeramente na Kolegio Chaya Willems na Steenrijk i despues tur invitado ta bai huntu pa sigui selebrá na Skol Immanuel na Brievengat.

Tur mucha di skol básiko lo kome, gosa i disfrutá un biaha mas di e dia deportivo mas dushi di aña.

Organisashon di e Weganan di Rei pa e parti Karibense di Reino ta den man di Mavis Albertina i Fundashon Fudsek. Mas informashon bo por lesa i mira tambe riba nan paginá di facebook: Caribisch Koningsspelen.