Dia di Obrero, ta un di e dianan mas importante di aña pa nos para ketu, reflekshoná i duna atenshon na dje. A aña aki, kisas mas ainda.

Dia di Obrero, ta un di e dianan mas importante di aña pa nos para ketu, reflekshoná i duna atenshon na dje. A aña aki, kisas mas ainda.

Paso trabou, den tur su formanan ta algu di balorá. E balor di trabou ta mas ku gana ‘pan di kada dia’. Trabou ta ekspreshon di abilidat i talento, trabou ta reflehá kuriosidat i pashon, trabou ta nifiká kresementu personal i desaroyo profeshonal. Trabou ta e orguyo di por proveé i kuida nos famia i e goso den momentunan inolvidabel ku nos sernan kerí.
Trabou ta amplia horizonte i sera lasonan di kolaborashon i amistat ku koleganan, tutornan i klientenan. Trabou ta e vehíkulo den kua nos tur ta kontribuí nos granito di ekselensia pa forma e fundeshi pa un pais produktivo, kompetitivo, inovativo i próspero pa nos mes, pa nos próhimo i pa futuro generashonnan.
Ta p’esei nos mester balorá kada un trahadó. Nos mester balorá kada un persona den e komunidat aki ku di un òf otro forma ta laborá, kada un di nos ku ta sali kas tur dia bai ku hopi energia i disiplina i ta duna di su mes pa konstruí un futuro pa un i tur, kontribuyendo i laborando pa futuro di nos pais.
Manera e desénas di boluntarionan ku ta sali nan kas i bai hasi trabou boluntario ku dedikashon na sirbishi di nos komunidat, en partikular nos muchanan òf esnan ku nesesidat spesial. Pero tambe e ama di kas ku tur mainta ta lanta ku motivashon nobo pa kontribuí ku su famia, pa prepará ku hopi kuido i pasenshi e muchanan pa skol, prepará kos pa kome pa un i tur i tene e kas limpi dia den dia afó obrando ku hopi dedikashon i amor na benefisio di su famia. Esaki, segun mi, ta e esensia di trabou. Kaminda e persona sa ku e tin un balor agregá, un meta mas profundo ku gana su entradá i ta na sirbishi di su sernan kerí i na nos komunidat.

Mi ta yama tur trahadó – kual sea su fishi, su trabou ku e ta hasi dia aden dia afó ku sodó di su frenta pa pone pan riba mesa pa su famia, kada ken ku ta hasi trabou voluntario i mayor ku ta traha tur dia pa bienestar di su famia – di kurason, un felis dia di Obrero. Mi ke ekspresá mi gratitut pa e kontribushon ku kada un ta hasi tur dia na bienestar di nos pais!

Na otro banda mi ta konsiente ku na e momento aki tin hopi di nos ku tin abilidat i gana di traha i gana su pan na un manera drechi, pero ku nò ta hañando un oportunidat. Nos tin basta kompatriota ku ta pasando momentonan difísil ku mester un chèns pa duna un kontribushon na nan famia i na nos komunidat. Riba e dia aki, ta importante pa nos rekonosé ku esnan ku ta buskando trabou, ta ansioso pa un oportunidat pa ekpresá nan talento, nan pashon i duna nan parti pa progreso di nan mes, nan sernan kerí i nos komunidat, tambe tin balor. Tambe rekonosé esnan ku ta enkarselá, ku ke traha i biba un bida digno, tambe tin balor
P’esei mi ta hasi un yamada urgente na tur nos partnernan sosial, na sindikato i dunadó di trabou, pa nos sigui traha huntu ku e meta di krea mas oportunidat di trabou pa kada yu di Kòrsou por haña un trabou digno i ku na un manera desente por kuida su mes i su famia. Mi ta kere den Kòrsou su potensial i ta konvensí ku si nos tur pone kabes huntu, esta gobièrnu, empresario i trahadó pa nos por krea sufisiente abundansia i oportunidat pa un i tur por laborá segun su proprio potensial, kapasidat i ambishon. Esaki mester ta nos mishon, nos ambishon i pashon komun. Den aña 2018, trabou mester haña atenshon di prioridat.
Pa e motibu aki mi ta hasi un yamada dramatiko na tur nos partnernan sosial pa hasi mas na kolaborashon en bes di konfrontashon i ban traha mas den union en bes di krea i mantené divishon, laga nos pone nos atenshon na krese ekonomia i krea kuponan di trabou, laga nos huntu tuma e pasonan nesesario pa hasi nos sektornan mas kompetitivo i halsa produktividat, laga nos invertí den nos trahadonan i pone atenshon spesial na kapasitashon i preparashon di nos hóbennan. Ta asina nos por produsí, krea abundansia i sòru pa tur nos hendenan por benefisiá di esaki. Nos por!
Shonnan, di kurason mi ta pidi boso, laga nos hasi uso di e dia aki pa reflehá i ta konsiente ku nos tin hopi trabou ainda nos dilanti. P’esei mi ke pidi kada un di boso laga riba e dia di obrero aki nos tur renobá e kompromiso pa huntu traha riba mas i mihó trabou pa yunan di Kòrsou. Un biaha mas … felis Dia di Obrero na tur ku ta laborá di un manera òf otro. Laga nos tur buta man na obra pa un mihó Kòrsou.
Riba potrèt por mira Promé Minister Eugene Rhuggenaath huntu ku Minister Kenneth Ghijsbertha, Minister Steven Martina, Presidente di Parlemento William Millerson i lidernan di sindikato na Misa Santa Famia awe mainta.
Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: