Parlamentario Curtley Obispo: E di 2 resúmen, kuenta i rason over di aña parlamentario 2018/2019: kapítulo 2 di 2

E di 2 resúmen, kuenta i rason over di aña parlamentario 2018/2019: kapítulo 2 di 2.

Parlamentario Curtley Obispo ta sigui duna kuenta i rason na Pueblo di Kòrsou. E di 6 relato desde ku e ta miembro di Parlamento di Kòrsou for di 4 yanüari 2017. E biaha aki, e di 2 resúmen kuenta i rason over di aña parlamentario 2018/2019 pa loke ta trata e promé 6 lunanan (periodo di 11 sèptèmber 2018 te ku 11 mart 2019).

Reunionnan i dokumentonan di Parlamento

Durante e periodo di e promé 6 luna di e aña parlamentario 2018/2019, parlamentario Curtley Obispo a asistí, partisipá i kontribuí aktivamente na 32 di e 32 reunionnan realisá di komishon sentral i reunionnan públiko pa loke ta tratamentu di leinan i tópikonan di gobernashon di Kòrsou. Den e kuadro aki pa parlamentario Curtley Obispo ta masha importante pa lesa/tuma nota di dokumentonan pa asina ta bon informá, ta bon prepará i ta bon dokumentá pa reunionnan i tambe pa skibi kartanan na Gobièrnu di Kòrsou. Parlamento di Kòrsou a risibí durante e periodo ariba menshoná mas ku 470 dokumento kual ta konsistí di míles di página. Dokumentonan di proyektonan di lei, kartanan di Gobernador di Kòrsou, kartanan di ministernan di Gobièrnu di Kòrsou, leinan di Reino Hulandes, kartanan di miembronan di Parlamento di Kòrsou, kartanan di tersera, dekretonan nashonal, rapòrtnan, kuentanan anual, dekretonan i geloofsbrief.

Komishon fiho di Finansa i Komishon fiho di Enseñansa, Siensia, Kultura i Deporte

Komo vice presidente di e komishon fiho di Finansa parlamentario Curtley Obispo a partisipá aktivamente na tur e 3 reunionnan realisá durante e periodo ariba menshoná. Komo presidente di e komishon fiho di Enseñansa, Siensia, Kultura i Deporte partisipashon tabata 100% pa loke ta trata e 2 reunionnan realisá komo presidente di e komishon aki durante e periodo ariba menshoná.

Parlatino

Parlatino, e Parlamento Latino Amerikano i di Karibe formá pa 23 pais, segun parlamentario Curtley Obispo sigur tin su balor agregá pa e konosementu ku bo ta atkerí i tambe pa loke ta trata kontaktonan ku bo ta hasi ku organisashon nan internashonal i tambe ku parlamentarionan di Latino Amérika i di Karibe. Durante e periodo ariba menshoná, parlamentario Curtley Obispo a hasi 2 biahe di trabou pa Parlatino, Panamá. E promé biahe na òktober 2018 tabata en konekshon ku e komishon di Equidad di Genero, Niñez i Juventud. Di e reunion aki parlamentario Curtley Obispo a reportá ampliamente over di e tema i e proyekto di deklarashon pa kombatí  violensia polítiko i akoso polítiko kontra di hende muhé. E di 2 biahe di trabou tabata na novèmber 2018 komo miembro di Directiva de Comisiones di Parlatino. Durante e reunion aki di e Directiva de Comisiones di Parlatino a trata e resultadonan di aña 2018 i e plan di trabou di aña 2019 di tur e 13 komishonnan fiho di Parlatino.

Potret 2019 parlamentario Curtley Obispo

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: