Minister Marilyn Alcalá-Wallé ta stimulá inklushon i partisipashon di mayor den enseñansa

Minister Marilyn Alcalá-Wallé ta stimulá inklushon i partisipashon di mayor den enseñansa

 

WILLEMSTAD – Resientemente Minister di Enseñansa, Siensia, Kultura i Deporte, sra. drs. Marilyn Alcalá-Wallé a tene un seshon di informashon pa komishonnan di mayor di skolnan di fundeshi, na Biblioteka Nashonal Kòrsou. Meta di e seshon aki tabata pa stimulá inklushon i partisipashon di mayornan den enseñansa.

Durante di e seshon Minister Alcalá-Wallé a tene un presentashon den kuadro di e ordenansa di lei pa Enseñansa di Fundeshi (LANDSVERORDENING van de 14e November 2008 houdende de regeling met betrekking tot funderend onderwijs, artikel 17), ku ta indiká ku kada skol di fundeshi, ta disponé di un komishon di mayor. Funshon di e komishon ta pa atendé asuntunan di interes di e alumnonan di skol, den konsulta ku un i tur ku ta envolví pa asina konhuntamente yega na un bon koperashon i funshonamentu optimal di e skol.

Ministerio di Enseñansa, Siensia, Kultura i Deporte ta den proseso pa garantisá ku tur skol tin un komishon di mayor, ku tur sa nan derechi i deber i ta funshoná segun e ordenansa di lei.

Den e kuadro aki Minister Alcalá-Wallé a duna splikashon tokante e.o. e kontenido di e ordenansa di lei, vishon di Gabinete Rhuggenaath riba enseñansa, e meta, e struktura, tareanan, derechi i partisipashon di e komishon di mayor den e proseso di enseñansa.

Minister Alcalá-Wallé a enfoká riba e koperashon di e diferente órganonan ku ta esensial pa krea skolnan magnétiko i kada un su lugá i funshon. Ta trata aki di e órgano di Komishon di Mayor, e organisashon kúpulo di Komishon di Mayor, e Konseho di Enseñansa (Onderwijsraad) i partisipashon di mayor aden, e Komishon di Keho (klachtencommissie) i e proseduranan kaminda tur mayor por entregá eventual keho .

Partisipashon di mayornan den e proseso di enseñansa ta indispensabel pa yuda garantisá kalidat di enseñansa.

E seshon di informashon tabata unu eksitoso kaminda mayornan tabata tin espasio pa partisipá aktivamente i dialogá ku Minister tokante e diferente tópikonan ku a keda tratá.

Pa medio di partisipashon, inklushon i un bon koperashon di tur e órganonan ariba menshoná, huntu nos ta krea un sistema di enseñansa kaminda ta ofresé enseñansa di mihó kalidat pa nos hóbennan.