Telecuraçao i Blue Nap Americas no ta parti di benta di UTS

Telecuraçao i Blue Nap Americas no ta parti di benta di UTS

Manera ta konosí, Cable & Wireless, ku ta forma parti di Liberty Latin America, a drenta un akuerdo definitivo ku Gobièrnu di Kòrsou pa kumpra 87.5% di akshon di United Telecommunication Services (UTS) . Gobièrnu di St. Maarten ketu bai ta doño di 12.5 % di akshon di UTS.

E kompanianan Antilliaanse Televisie Maatschappij N.V. (TeleCuraçao) i Dataplanet N.V. (Blue Nap Americas) no ta forma parti di e akuerdo aki. E dos kompanianan aki lo ser aloká den un fundashon ku lo ser manehá dor di Gobièrnu.

Minister enkargá ku Trafiko, Transporte i Telekomunikashon, Sra. Zita Jesus- Leito i CEO di UTS, Sr. Paul de Geus, a tene un seshon informativo ku e empleadonan di TeleCuraçao i Blue Nap Americas pa informá nan di e akuerdo aki.

Ku e akuerdo aki, un era nobo ta kuminsá  pa e kompanianan TeleCuraçao i Blue Nap Americas.