NOS SELEKSHON NASHONAL A KLASIFIKÁ TANTU PA GOLDCUP 2019 KOMO E SEGUNDA BUÈLTA NATIONS LEAGUE!

NOS SELEKSHON NASHONAL A KLASIFIKÁ TANTU PA GOLDCUP 2019 KOMO E SEGUNDA BUÈLTA NATIONS LEAGUE!

Manera ya ta konosí den luna di sèptèmber di aña pasa Nations League organisá pa CONCACAF a inisiá. Tur e 41 miembronan di CONCACAF ta partisipá na Nations League ku esepshon di Guatemala ku tabata di skòrs. E kampionato aki a tuma lugá di sèptèmber 2018 te ku mart 2019 durante kalendario di FIFA. Kòrsou a partisipá den un grupo di 4 pais kaminda nos a klasifiká komo number 1 den nos grupo ku 22 gol na fabor, 2 gol kontra i un saldo positivo di 20 gol. Esaki debí na 3 viktoria i un derota ku nos ta tin. Nos tin e mihó saldo di gol ku tur e 35 partisipantenan. Ku e resultadonan aki Kòrsou a keda komo number 4 riba e tabla di posishon den tur e 35 paisnan ku a partisipá.

Konsekuentemente nos a klasifiká pa Gold Cup ku tin 16 pais den kontienda. Tambe nos a klasifiká pa e segundo buèlta di Nations League (Liga A).

Di e 16 paisnan di Gold Cup, e promé 6 nan ya tabata konosí for di adelantá i nan no mester a partisipá den e promé buèlta aki. E 6 paisnan aki a klasifiká outomatikamente pa Gold Cup i tambe pa e segundo buèlta di Nations League (liga A). Esaki ta e 6 paisnan ku a partisipá den e parti último pa klasifikatorio di mundial Russia 2018.

Ku e klasifikashonnan aki Kòrsou a logra su meta di por partisipá den Gold Cup 2019 ku lo tuma lugá den luna di yüni 2019 na Merka, na Costa Rica i tambe na un pais den Karibe.

Tambe nos a logra nos partisipashon den e segundo buèlta (liga A) di Nations League. Esaki ta konsekuensia ku Kòrsou ta posishoná den e 12 mihó paisnan di CONCACAF lagando paisnan manera Jamaica, El Salvador ku Nicaragua afó.

E segundo buèlta di Nations League ta kuminsá na sèptèmber awó i ta tèrminá na mart 2020.

Kòrsou por ta orguyoso ku pa di 2 biaha konsekutivo nos lo partisipá den Gold Cup i alabes pa di promé biaha den e segundo buèlta di Nations Legaue.

Awor, e preparashonnan ta kontinuá pa tantu Gold Cup komo e segundo buèlta di Nations League.

FFK i e hungadónan ta konta ku e sosten di hinter nos komunidat pa e kompromisonan importante aki ku nos tin na kaminda!

Pabien Kòrsou!