Parlamentario Gilbert Doran ku pregunta na Minister Alcala-Walle, ku topiko; Pregunta relashoná ku konstrukshon di un “Shelter” na e skol Mgr. Julio Henriquez den e bario di Fuik
Na Minister di OWCS
Señora Marylin Alcala-Walle
PRESENTE
Willemstad, 27 di mart 2019
Tópiko: Pregunta relashoná ku konstrukshon di un “Shelter” na e skol Mgr. Julio Henriquez den e bario di Fuik
Honorabel señor Minister Alcala-Walle,
Frakshon di MFK a tuma nota di deklarashon nan di abitantenan di Fuik relashoná ku e intenshon di gobiernu den koperashon ku Krus Kora di Kòrsou pa konvertí e skol Mgr. Julio Henriquez den un “Shelter”.
Abitantenan no ta di akuerdo ku e intenshon di gobiernu i nan ta sinti ku komo abitantenan di e bario nan no a sufisiente partisipashon den hinter e proseso aki i segun e abitantenan aki, e seshonnan di informashon ku a wòrdu duna a ser hasi na un grupo chikí di e bario.
Tambe e abitantenan ta hasi menshon ku a informá nan ku e “Shelter” aki lo bai sirbi pa refugiado/ilegalnan for di eksterior.
Pa medio di e karta aki i hasiendo uso di artíkulo 96 di “Reglamento di Orden” nos ta hasi minister Alcala-Walle e siguiente preguntanan;
- Ta bèrdat ku ta bai konvertí e skol menshoná den un “Shelter”?
- Si kontesta na pregunta unu (1) ta afirmativo, e “Shelter” aki lo bai sirbi komo un espasio pa si tin un kalamidat den temporada di orkan òf pa ubika refugiado/ilegalnan?
- A informá e bario kompleto di Fuik kiko ta e intenshon di gobiernu i Krus Kora pa ku e skol òf a informá un grupo chikí so di e bario?
- Departamentonan tékniko di gobiernu a inspekshon e skol pa mira ku e dak no ta kontené asbèst?
- ROP a otorgá e pèrmit nan nesesario pa e rekonstrukshon di e skol aki den un “Shelter?
- Tabatin un plan pa konvertí e skol aki den un sentro multi-funkshonal pa e bario di Fuik?
- Si kontesta na pregunta number 7 ta afirmativo ki dia lo kuminsá ku e konstrukshon di e sentro multi-funkshonal aki?
- Kua ta e ròl di Krus Kora den hinter e trayekto ku e abitantenan di Fuik ta reklamando?
Frakshon di MFK ta spera ku Minister Alcala-Walle a tuma bon nota di e kontenido di e karta aki i ku Minister lo kontestá nos preguntanan den e tempu stipulá konforme e protokòl entre Parlamento i Gobièrnu di Kòrsou.
Atentamente,
Gilbert Doran
Miembro di Parlamento
pa Frakshon di MFK