Minister Xiomara Ruiz-Maduro ta informa: BBO NO TA SUBI Opocicion pa falta di conocemento of malicia ta manipula informacion

Minister Xiomara Ruiz-Maduro ta informa:

BBO NO TA SUBI

Opocicion pa falta di conocemento of malicia ta manipula informacion

 

ORANJESTAD – For di basta dia oposicion ta purba bruha tera y trece miedo den comunidad bisando cu BBO lo conoce un subida sea pa 10% of 12%. E informacion aki no ta corecto. BBO no ta subi. Ningun decicion a wordo tuma pa hisa BBO manera cu oposicion kier sugeri.

Oposicion ta usando un raport reciente di IMF den cual nan ta duna nan opinion y ta duna recomendacion pa reforma fiscal di nos Pais. Den e rapport aki IMF ta sugeri pa Aruba introduci un VAT, un BTW di 10%. E ta un recomendacion di IMF, pero no un decision di Gobierno di Aruba. E sistema di impuesto di VAT of BTW no ta mescos cu e sistema di BBO. Pero oposicion no ta splica esaki y ta prefera pa djies bruha tera bruhando e dos sistemanan aki den otro. 

E sistema di BBO NO a wordo traha pa ta 10% of mas. Esun cu kier papia di BBO na 10% of 12%, ta pasobra nan falta conocimento di e materia of ta pasobra nan tin malicia den cabes. Si oposicion tabata serio den nan critica, nunca nan lo por a sugeri cu BBO ta bira 10% of mas ya cu e sistema di BBO simplemente no a wordo traha pa porcentahe halto di impuesto.

Pues tur hende por keda trankilo y no laga oposicion manipula nan cu mal informacion. Gabinete Wever-Croes ta traha tur dia na un manera serio pa logra yega via e reforma fiscal na un sistema di impuesto cu ta simpel y husto pa nos Pais.

This site uses Akismet to reduce spam. Learn how your comment data is processed.

%d bloggers like this: