Minister di Finansa, Asuntonan Economico y Cultura: SISSTEM ta contribui na Economia di Conocemento como un di e Sectornan Prometedor pa diversifica nos Economia
Minister di Finansa, Asuntonan Economico y Cultura:
SISSTEM ta contribui na Economia di Conocemento como un di e Sectornan Prometedor pa diversifica nos Economia
ORANJESTAD – Durante e conferencia di prensa semanal di gobierno Minister Xiomara Ruiz-Maduro a anuncia cu danki na e inversion di 13.05 miyon di e 11 Fondo di Desaroyo di Union Europeo dentro di poco Aruba lo conoce un facultad nobo di Sustainable Island Solutions through Sciences, Technology, Engineering and Mathematics (SISSTEM) na Universidad di Aruba.
Na e Facultad SISSTEM studiantenan por ricibi nan grado di Bachelor den estudionan di Sciencia, Technologia, Ingenieria y Matematica (STEM). Tambe e studiantenan por obtene un Master den Sostenibilidad y alabes lo ofrece un programa di Post Doctorado (PhD). Hunto cu tur esaki lo establece tambe un Centro Caribense di STEM y un Centro pa por haci investigacion riba Sostenibilidad.
E Facultad SISSTEM lo duna oportunidad na studiantenan local pa por sigui nan estudionan di Sciencia, Technologia, Ingenieria y Matematica na Aruba mes y alabes lo atrae studiantenan den nos region. E estudionan den Sciencia, Technologia, Ingenieria y Matematica lo ta na un nivel Europeo, ya cu e Katholieke Universiteit Leuven (KULeuven), Belgica ta encarga pa traha e curiculo di Bachelor, Master y PhD. KULeuven ta na di 6 lugar na mundo conoci como universidad di inovacion. Universidad di Aruba ta planea pa cuminsa cu SISSTEM na luna di september proximo. Ya caba tin hopi interes pa e facultad nobo aki. Pa mas informacion tocante SISSTEM, por tuma contacto cu Universidad di Aruba.
Como Minister encarga cu Economia, e mandatario a expresa cu e proyecto di SISSTEM ta pas perfectamente den e vision economico di nos pais. E facultad di SISSTEM ta parti di e economia di conocemento cu ta un di e 6 sectornan prometedor pa diversificacion di nos economia. Elo brinda oportunidad pa studiante local y internacional wordo forma intelectualmente den e estudio di STEM y Sostenibilidad y ta brinda oportunidad pa exporta e conocemento aki como parti di solucion pa yega na e metanan di desaroyo sostenibel manera defini pa Nacionnan Uni.
E programa SISSTEM lo contribui na Gobierno su esfuerso di desaroyo sostenibel, pa implementa y crea diversificacion den economia y stimula inovacion. ‘E economia di nos pais lo haya un impulso cu e Facultad SISSTEM. E edificio monumental di Maria Convent lo ser renoba y ekipa, lo recluta docente y tambe lo atrae studiantenan den region. E conocemento adkiri riba sostenibilidad lo por wordo exporta. Tur esaki ta contribui positivamente na e desaroyo di nos economia,’ e mandatario a indica.
Minister Xiomara Ruiz-Maduro ta yama danki na Universidad di Aruba pa apoya Gobierno den su vision di desaroyo sostenibel y inovacion. Palabra di gratitud ta bay na tur experto pa nan esfuerso pa haci e bunita proyecto aki posibel, specialmente e expertonan di Departamento di Asuntonan Economico cu a traha hopi duro pa Aruba no perde e bunita proyecto aki.
