Prome Minister Evelyn Wever-Croes: Estrechando lasonan pa bienestar y progreso: PREMIER DI ARUBA TA ATENDE DISCURSO DI PREMIER DI SINT MAARTEN

Prome Minister Evelyn Wever-Croes:

 

Estrechando lasonan pa bienestar y progreso:

PREMIER DI ARUBA TA ATENDE DISCURSO DI PREMIER DI SINT MAARTEN

 

Diahuebs mainta Premier Evelyn Wever-Croes a atende e discurso di Premier di Sint Maarten Leona Marlin-Romeo na Universidad di Aruba. Premier Marlin-Romero tambe tawata orado na e Prome Conferencia Internacional riba ‘Small Island States’ (SIS) ‘Subnational Island Jurisdictions’ (SNIJs) cua conferencia a hiba e tema ‘Sharing Stories of Island Life, Governance and Global Engagement’.

 

Premier Marlin-Romero a comparti e experiencia di Sint Maarten despues di orcannan Irma y Maria na 2017 y a duna motibonan di con ta asina importante pa ta prepara, no solamente pa e desaster natural, sino tambe pa re-construi un pais di e efectonan di e disaster. Prome Minister Evelyn Wever-Croes ta expresa cu e puntonan cu Premier Marlin-Romero a trece den su discurso sigur por ta di gran ayudo pa Aruba den caso di eventualidadnan di e extremo manera cu a pasa na Sint Maarten.

 

Ta di remarca cu Prome Minister Evelyn Wever-Croes y Prome Minister Leona Marlin-Romeo a asumi nan responsabilidad como Prome Minister di nan pais cu solamente algun luna di diferencia. Y inmediatamente e dos mandatarionan a cuminsa estrecha e lasonan di amistad entre Aruba y Sint Maarten.

 

Na mundo tin actualmente 11 Presidente femenino y 10 Minister Presidente femenino. Reino tin 2 di e 10 Minister Presidente femenino! Y por bisa cu ambos Prome Minister tin interesnan comun pa trece bienestar y progreso pa Sint Maarten y Aruba respectivamente.